Täjigistanyň ýaşlar ýygyndysynyň hüjümçisi Muhammad Nazriýew milli ýygyndylaryň arasyndaky duşuşykda iň köp gol geçirip, dünýä rekordyny goýdy.
16 ýaşyndaky futbolçy Aziýanyň Kubogy ýaryşynyň saýlama tapgyrynda 17 ýaşa çenli Täjigistanyň milli ýygyndysynyň düzüminde Guamyň ýygyndysy bilen geçirilen duşuşykda 14 gol geçirdi. Bu duşuşykda Täjigistan Guamy 33:0 hasabynda utdy.
Mundan ozal, FIFA-nyň howandarlygynda geçirilen milli ýygyndylaryň arasyndaky resmi duşuşykda hiç bir gutbolçy şeýle köp sanda gol geçirmändi.
Mundan ozal, 2022-nji ýyldaky dünýä çempionatynyň saýlama tapgyrynda Awstraliýanyň ýygyndysy Samoany 31:0 hasabynda utupdy. Şonda awstraliýaly Arçi Topmson bu duşuşykda 13 gol geçiripdi.
Muhammad Nazriýew Duşenbe şäheriniň “Istiklol” toparynda çykyş edýär. Ol 2014-nji ýyldan bäri Täjigistanyň çempionatynda oýnap gelýär.
Täjigistandan soňra Guamyň ýygyndysy Omandan 18:0, Singapurdan 14:0 hasabynda utuldy.
GUAM BARADA
Guam Ýuwaş ummanyň günbatar bölegine ýerleşýän Marian adalarynyň iň köp ilatly adasydyr. Adada 170 müňe golaý adam ýaşaýar.
1996-njy ýylda Guam resmi taýdan FIFA-nyň agzasy boldy. Şondan bäri FIFA-nyň howandarlygyndaky ýaryşlara gatnaşýar.