65-nji halkara matematika olimpiadasynda türkmenistanly mekdep okuwçylary baýrakly orunlara mynasyp boldular. Olimpiada Beýik Britaniýanyň we Demirgazyk Irlandiýanyň Birleşen Patyşalygynyň Bat şäherinde geçirildi.
Halkara matematika olimpiadasyna dünýäniň 109 döwletinden, şol sanda Türkmenistandan zehinli mekdep okuwçylarynyň 609-sy gatnaşdy. Olimpiadada ýurdumyza okuwçylaryň 6-sy wekilçilik etdi. Olar dünýäniň beýleki ýurtlaryndan gelen deň-duşlary bilen bäsleşigiň ýokary halkara talaplara laýyk gelýän şertlerini ýerine ýetirmek ugrunda ukyp-başarnyklaryny görkezip, oňat netijeleri gazandylar.
Şeýlelikde, Aşgabat şäherindäki iňlis dili, himiýa we biologiýa derslerini çuňlaşdyryp öwredýän ýöriteleşdirilen 86-njy orta mekdebiň 10-njy synp okuwçysy M.Meýlismyradow we Daşoguz şäherindäki daşary ýurt dillerine ýöriteleşdirilen 24-nji orta mekdebiň 11-nji synp okuwçysy S.Koçkarow kümüş medala, paýtagtymyzdaky iňlis dili çuňlaşdyrylyp öwredilýän ýöriteleşdirilen 135-nji orta mekdebiň 11-nji synp okuwçysy H.Allaberdiýew hem-de Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy S.Halykow bürünç medala mynasyp boldular. Daşoguz şäherindäki iňlis dili, himiýa we biologiýa derslerini çuňlaşdyryp öwredýän 26-njy orta mekdebiň 11-nji synp okuwçysy A.Ahmetow we Aşgabat şäherindäki iňlis dili çuňlaşdyrylyp öwredilýän ýöriteleşdirilen 135-nji orta mekdebiň 11-nji synp okuwçysy M.Babageldiýew höweslendiriji baýraklar bilen sylaglanyldy.