Gresiýanyň gadymy Olimpiýa mekanynda şu ýylyň tomsunda Fransiýanyň Pariž şäherinde geçiriljek tomusky Olimpiýa oýunlarynyň alawy dabaraly ýagdaýda ýakyldy. Bu barada Gresiýanyň metbugaty habar berýär.
Dabara Gresiýanyň Prezidenti Katerina Sakellaropullu, Halkara Olimpiýa komitetiniň başlygy Tomas Bah, Gresiýanyň Milli olimpiýa komitetiniň ýolbaşçysy, Ýewropanyň Olimpiýa komitetleriniň ýolbaşçysy we Halkara Olimpiýa komitetiniň agzasy Spiros Kapralos, Pariž-2024 oýunlarynyň guramaçylyk komitetiniň ýolbaşçysy Toni Estange, Fransiýanyň sport ministri Ameli Udea-Kastera, Pariž şäheriniň häkimi Ann Idalgo, gadymy Olimpiýa şäheriniň häkimi Aristidis Panaýotopulos we 600 töweregi ýokary derejeli myhmanlar gatnaşdy.
Olimpiýa oýunlarynyň alawyny ýakmak dabarasyna aktrisalar gatnaşdy. Olar gadymy grek egin-eşiklerini geýip, alawy ýakmagyň milli däplerini ýerine ýetirdiler.
Kompozitor Dimitras Papadimitriniň sazy esasynda horeograf Artemis Ignatiunyň ýolbaşçylygynda dabara guraldy.
Grek aktrisasy Meri Mina Olimpiýa oýunlarynyň alawyny ýakdy. Soňra ol alawy grekleriň altyn medalçysy Stefanos Duskosa berdi. Şeýlelikde, Olimpiýa oýunlarynyň alawynyň estafetasy badalga aldy we ol Gresiýanyň çäginde 11 gün, ýagny 26-njy aprele çenli dowam eder.
Soňra Afiny şäherindäki Panafineý stadionynda Olimpiýa oýunlarynyň alawy bu iri halkara ýaryşy gurnaýjy Fransiýanyň Pariž şäheriniň wekillerine dabaraly ýagdaýda gowşurylar.
Pandemiýadan soňra ilkinji gezek şu Olimpiýa oýunlarynyň alawynyň estafetasyna tomaşaçylar hem gatnaşyp bilerler.
Tomusky Olimpiýa oýunlary Pariž şäherinde 26-njy iýul-11-nji awgust aralygynda geçiriler.