Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Türkiýe Respublikasynyň Prezidenti Rejep Taýyp Ärdoganyň arasynda telefon arkaly söhbetdeşlik boldy. Bu barada Türkiýe Respublikasynyň Prezidentiniň Aragatnaşyk müdirliginiň resmi saýtynda habar berilýär.
Telefon arkaly söhbetdeşligiň barşynda türkmen halkynyň Milli Lideri we türk Lideri birek-biregi mübärek Oraza baýramy bilen gutladylar.
Şeýle hem taraplar Türkmenistan bilen Türkiýäniň arasyndaky ikitaraplaýyn gatnaşyklary ara alyp maslahatlaşyp, sebit we halkara gün tertibiniň meseleleri boýunça pikir alyşdylar.
Prezident Ärdogan telefon söhbetdeşliginde Türkmenistanyň Türki Döwletleriň Guramasyna bolan gyzyklanmasynyň artýandygyny belläp, muňa uly kanagatlanma bildirdi.
Mälim bolşy ýaly, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow şu ýylyň 1-2-nji martynda üçünji Antalýa diplomatiýa forumyna gatnaşmak maksady bilen, Türkiýe Respublikasyna iş saparyny amala aşyrypdy. Bu saparyň barşynda geçirilen ýokary derejedäki gepleşikleriň netijesinde tebigy gaz ulgamynda möhüm ylalaşyklara gol çekilipdi.