13-nji iýunda paýtagtymyzdaky Mollanepes adyndaky talyplar teatrynda Türkmen Döwlet medeniýet institutynyň 5-nji ýyl talyplarynyň diplom işleri hökmünde rus ýazyjysy Aleksandr Nikolaýewiç Ostrowskiýniň “Tupan” atly pýesasy esasynda sahnalaşdyrylan spektaklyň ilkinji görkezilişi boldy. Oňa paýtagtymyzyň ýaşaýjylary, talyplar, mugallymlar hem-de döredijilik intelligensiýasynyň wekilleri gatnaşdylar.
Ýaş, sungata ýaňy gadam basan geljekki artistleriň sahnadaky hyjuwly hereketleri, keşpleri erjellik bilen täsirli ýerine ýetirmäge synanyşmaklary-olaryň kärleriniň hakyky ussatlary bolup ýetişjekdiklerine bolan garaýyşlary oýardy.
Türkmenistanyň halk artisti Aşyrmyrat Gurbanowyň režissýorlyk etmeginde goýulan bu sahna oýnuna tomaşa etmäge gelenleriň her birinde ýakymly täsirleri galdyrdy.
Sahna oýny tamamlanandan soňra gyzgyn el çarpyşmalardyr, owadan güller sahnany aýratyn gözellige besledi.
Bägül Kakalyýewa,
TDM-niň Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.