Şu gün Türkmenistanyň paýtagty Aşgabat şäherinde türkmen-rus işewürlik forumy öz işine başlady. Günüň ikinji ýarymynda onuň işine ýurdumyza sapar bilen Russiýa Federasiýasynyň Hökümetiniň Başlygy Mihail Mişustin hem-de Russiýa Federasiýasynyň Tatarystan Respublikasynyň Prezidenti Rustam Minnihanow gatnaşdy.
Rus metbugatynda orun alan habarlara görä, forumda iki ýurduň arasynda energetika, logistika, ulag, aragatnaşyk, dokma, oba hojalyk we beýleki pudaklarda hyzmatdaşlygyň has-da ösdürilmegine degişli teklip we başlangyçlar öňe sürüldi.
- Russiýa bilen Türkmenistan ulag, gämi gurluşygy, derman senagaty, geologiýa, nebit we gaz pudagy boýunça bilelikdäki taslamalary durmuşa geçirmäge taýýarlanýar.
- Russiýanyň gatnaşmagynda Türkmenistanda umumy bahasy 3,5 milliard dollar maýa goýum bilen 20-den gowrak taslama durmuşa geçirilýär.
- Tatarstanyň we Sankt-Peterburgyň gämi gurluşyk kompaniýalary Türkmenistan üçin iki sany parom we bir sany gury ýük gämisiniň gurluşygy barada gepleşikler geçirýär.
- Russiýa Türkmenistandan oba hojalyk we dokma önümleriniň satyn alynmagyny artdyrmaga gyzyklanma bildirýär.
- Logistika boýunça esasy bilelikdäki taslama Demirgazyk-Günorta ulag geçelgesiniň gündogar ugruny ösdürmekden ybarat.
- Ýangyç-energetika pudagy Türkmenistan bilen Russiýanyň arasyndaky gatnaşyklarda möhüm orun eýeleýär.
- Türkmenistan bilen Russiýanyň arasynda 300-den gowrak halkara resminama gol çekildi.
- Rus awtoulag öndürijileri 2023-nji ýyldaky sargyt bukjasynyň üstünde işläp, Türkmenistana awtoulag serişdelerini ibermek boýunça gepleşikler geçirýär.
- Russiýa tarapy Türkmenistan bilen söwda-ykdysady gatnaşyklary ösdürmek maksady bilen işewür taraplara wiza düzgünini ýeňilleşdirmäge taýýar.
- Russiýa Federasiýasynyň nebit kompaniýalary Türkmenistanda nebitgaz ýataklaryny özleşdirmek boýunça bilelikdäki taslamalara gatnaşmaga taýýar.
- Russiýa tarapy Türkmenistany Peterburg halkara ykdysady forumyna, “Russiýa-yslam dünýäsi” halkara ykdysaydy forumyna we beýleki halkara forumlara gatnaşmaga çagyrdy.