Türkmenistanyň daşary işler ministri, ykdysady hyzmatdaşlyk boýunça türkmen-ýapon komitetiniň başlygy Raşid Meredow bilen ykdysady hyzmatdaşlyk boýunça ýapon-türkmen komitetiniň başlygy, «Itochu Corporation» kompaniýasynyň dolandyryjy direktory Hiroýuki Subaýyň arasynda sanly ulgam arkaly duşuşyk geçirildi.
Duşuşykda taraplar iň ýokary we ýokary derejedäki gatnaşyklaryň döwletara gatnaşyklarynyň ösmeginde möhüm rol oýnaýandygyny bellediler. Şunuň bilen baglylykda, şu ýylyň sentýabr aýynda Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň ýolbaşçylygyndaky türkmen wekiliýetiniň saparynyň we netijeli duşuşyklarynyň ähmiýeti bellenildi.
Bu saparyň barşynda öňe sürlen takyk teklipler hem-de Tokiodaky duşuşyklarda ara alnyp maslahatlaşylan innowasion taslamalar boýunça pikir alşyldy.
Gepleşikleriň dowamy bilen, komitetleriň başlyklary infrastruktura pudagyndaky hyzmatdaşlyk üçin Ýol kartasyny täzelemek, innowasiýa ideýalary we degişli taslamalar bilen doldurmak meselelerine garadylar.
Türkmenistan bilen Ýaponiýanyň arasyndaky ykdysady hyzmatdaşlygyň strategiki, dowamly we uzak möhletleýin häsiýetini belläp, taraplar bu özara gatnaşyk üçin möhüm mehanizmiň ykdysady hyzmatdaşlyk üçin türkmen-ýapon we ýapon-türkmen komitetleriniň işjeň işiniň möhümdigini bellediler.
Şu nukdaýnazardan, şu komitetiň şu ýylyň ahyrynda 14-nji mejlisine taýýarlyk, gün tertibi we ýakyn wagtda geçiriljek duşuşykda gol çekilmegi meýilleşdirilýän resminamalar ara alnyp maslahatlaşyldy.