UEFA-nyň Çempionlar ligasy Ýewropanyň öňdebaryjy futbol çempionatlarynyň futbol toparlarynyň gatnaşmagynda geçirilýän uly ýaryşlaryň biridir. Bu ýaryşa gatnaşan her bir topar ýeňiji bolmak üçin tagalla edýär.
Ine, şeýlelikde şu ýylyň 28-nji maýyndan 29-njy maýyna geçilen gije Angliýanyň “Liwerpul” bilen Ispaniýanyň “Real Madrid” topary finalda duşuşdy. Fransiýanyň Pariž şäheriniň “Stad de Frans” stadionynda geçirilen duşuşykda 1:0 hasabynda ýeňiş gazanan “Real Madrid” topary çempion boldy.
Bu ýaryşda toparlaryň näçe gazanandygy hemmeleri gyzyklandyrýan bolsa gerek.
UEFA guramasy toparçalardaky duşuşyklar üçin 15 million 640 müň ýewro bölüp berýär. Toparçalarda her bir topar 6 duşuşyk geçirýär we ýeňiş gazanan topara 2 million 800 müň ýewro, deňme-deň oýnalandan her bir topara 930 müň ýewro berilýär.
Toparçasynda birinji we ikinji orny alyp, 1/16 tapgyryna çykan toparlara 9 million 600 müň ýewro berilýär. Mundan soňra baýraklaryň möçberi hem artýar.
Çärýek finala çykan toparlara 10 million 600 müň, ýarym finala çykan toparlara 12 million 500 müň ýewro pul sylagy berilýär. Finala çykan toparlara 15 million 500 müň ýewro, çempion bolan topara bolsa goşmaça 4 million 500 müň ýewro berilýär.
Şeýlelikde, bu ýaryşa gatnaşyp, ähli duşuşyklaryny gazanyp, ýeňiji bolan topar 85 million 140 müň ýewro alýar.
Geçen ýylyň çempiony “Çelsi” topary 78 million 850 müň ýewro pul sylagy gazanypdy.