Angliýadan soňra Italiýanyň milli futbol çempionatynda çempion belli boldy. Bu ýurduň çempionatynda hem bir şäheriň iki topary “Milan” hem-de “Inter” toparlary ahyrky tapgyra çenli çempionlyk üçin bäsleşdiler.
11 ýyldan soňra çempion bolmagy başaran “Milan” topary “Seria A” çempionatynyň jemleýji tapgyrynda “Sassuolo” toparyny 3:0 hasabynda ýeňip, 86 utuk bilen birinjiligi eýeledi.
Bu topar soňky gezek 2010-11 möwsüminde çempion bolupdy. Geçen möwsümde “Inter” çempion bolan bolsa, ondan öňki möwsümde “Ýuwentus” topary 9 ýyl yzly-yzyna çempion bolupdy.
Şeýlelikde, “Milan” bilen “Inter” toparlary soňky 2 möwsümden bäri “Ýuwentus” toparynyň çempionatdaky hegemoniýasynyň öňüne geçmegi başardylar.
“Milan” topary “Seria A” çempionatynda umumylykda, 19-njy çempionlygyny gazandy. Bu ugurda öňdeligi “Ýuwentus” eýeleýär we onuň 36 çempionlygy bar.
40 ÝAŞYNDA ÇEMPION BOLDY
“Milan” toparynyň düzüminde iň garry futbolçysy, şwesiýaly Zlatan Ibragimowiç 40 ýaşynda çempion bolmagy başardy. Şeýlelikde, Zlatan futbol karýerasynda 32 kubok gazandy, 12 gezek 4 aýry döwletde çempion bolmagy başardy. Ol 2 gezek «Aýaks» (2001/02, 2003/04), 3 gezek «Inter» (2006/07, 2007/08, 2008/09), 1 gezek «Barselona» (2009/10), 4 gezek «PSŽ» (2012/13, 2013/14, 2014/15, 2015/16) we 2 gezek hem «Milan» (2010/11, 2021/22) bilen çempion boldy.
ÇEMPIONLYK GIJESINDE GYNANDYRYJY WAKA HEM BOLDY
Ýerli neşirleriň habar bermegine görä, çempionlyk gijesinde meýdançada toparynyň futbolçylary bilen begenjini paýlaşýan pursatlarynda toparyň tälimçisi Stefano Pioloniň altyn medaly ogurlanypdyr.
– Meniň altyn medalymy kimdir biri boýnumdan alypdyr. Meniň beýanatymyň täsiri bolsa, minnetdar bolaryn. Bu meniň ýeke-täk medalym – diýip, Piolo beýanat berdi.
Soňra “Seria A” çempionatynyň metbugat gullugy öz jemgyýetçilik torundan beýanat berip: “Mister Pioli, ertir biz size ýene-de bir medal bereris” – diýip, belläp geçipdir.