Her ýylyň 20-nji oktýabry – Halkara aşpezler güni hökmünde dünýäniň dürli künjeginde aşpez hünärmenler tarapyndan bellenilýär. Bu halkara sene Bütindünýä aşpez jemgyýetiniň başlangyjy bilen 2004-nji ýylda döredilýär. Ýeri gelende belläp geçsek, bu guramanyň dürli ýurtlaryň wekillerinden ybarat bolan 8 million agzasy bardyr. Halkara aşpezler güni dünýäniň 70-den gowrak ýurdunda bellenilýär.
Häzirki wagtda aşpezlere bildirilýän talaplar has-da artdy. Şonuň üçin hem aşpezçilik iň jogapkärçilikli kärleriň biridir. Mysal üçin, Sankt-Peterburgda aşpezleriň esasy wezipesi datly tagam bişirmek bilen birlikde, saglyk taýdan hem oňaýly iýmitleri taýýarlamak bolup durýar. Köp ýurtlarda hakyky aşpez hünärmenlerinden himiýa, biologiýa ýaly bilimlerden hem baş çykarmak talap edilýär.
Bu halkara gününde aşpezlere we olaryň özleri hem biri-birlerine baýramçylyk gutlaglaryny aýdýarlar. Syýahatçylyk kompaniýalarynyň işgärleri, naharhana kärhanasynyň, restoranlaryň, kafeleriň eýeleri dürli baýramçylyk çärelerini guramaga gatnaşýarlar. Şeýle hem bu halkara baýramçylygy mynasybetli aşpezleriň arasynda bäsleşikler gurnalýar, tagamlaryň sergisi geçirilýär. Hatda käbir ýurtlarda aşpezler bilim edaralaryna baryp çagalara tagamyň ähmiýeti dogrusynda sapak geçýärler.
Aýlar Atajykowa,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.