«Amazonyň» esaslandyryjysy Jeff Bezos 20-nji iýulda dogany we «Blue Origin» uçarynyň satuwdaky ýeňijisi bilen kosmosa uçýar. Ol bu barada özüniň «Instagramdaky» sahypasynda habar berdi.
Has takygy, Bezos habarynda: «Bäş ýaşymdan bäri kosmosa uçmagy arzuw edýärdim. 20-nji iýulda men doganym bilen bu syýahata girişerin. Iň gowy dostum bilen ajaýyp gezelenje gidýärin» diýip ýazdy.
Milliarderiň eýeçiligindäki «Blue Origin» kompaniýasy öz «Twitter» hasabynda Bezos we dogany bilen bile 12-nji iýunda tamamlanjak satuwyň ýeňijisi hem kosmosa uçjakdygyny habar berdi.
Ýatladyp geçmeli bolsa, «Blue Origin» kompaniýasy «New Shepard» kosmik gämisinde uçuş biletini online satuwa goýupdy. Bilet üçin tölenen pul, «Blue Origin» tarapyndan guralan «Club for the Future» gaznasyna geçiriler. Gaznanyň maksady ýaşlaryň ylym, tehnologiýa, inženerçilik we matematika ugurlarynda gyzyklanmasyny artdyrmak hem-de kosmosdaky ýaşaýyş pikirlenmesini ösdürmekden ybaratdyr.
2018-nji ýylda «Reuters» «New Shepard» gämisinde uçuşyň bahasynyň 200 müňden 300 müň dollar aralygynda boljakdygyny we bahanyň kompaniýanyň bäsdeşi bolan milliarder Riçard Brensonyň «Virgin Galactic» kompaniýasynyň meýilnamalaryna esaslanyp kesgitlenjekdigi aýdylypdy. «New Shepard» daşaýjy raketasy alty sany ýolagçyny Ýerden 100 kilometr belentlige alyp çykmaga niýetlenendir (deňeşdirmek üçin HKS orbitasy ortaça 420 kilometr belentlikde ýerleşýär).