Samarkantda «Merkezi Aziýa – Ýewropa Bileleşigi» uniwersitetleriniň kongresi başlandy. Bu çäre sebit ýurtlary bilen ÝB döwletleriniň arasynda ýokary bilim, ylym we innowasiýalar ulgamyndaky hyzmatdaşlygy ösdürmäge gönükdirilendir.
Bu çärä Merkezi Aziýanyň we Ýewropa Bileleşiginiň ýurtlaryndan ministrler, ministrleriň orunbasarlary, şeýle hem ýokary okuw jaýlarynyň we halkara guramalarynyň 300-den gowrak wekili gatnaşýar.
Guramaçylaryň maglumatyna görä, kongresiň işine ÝB ýurtlarynyň 45 uniwersitetinden 80-den gowrak wekil, Merkezi Aziýanyň 20-den gowrak uniwersitetinden 40-dan gowrak gatnaşyjy, şeýle hem Özbegistanyň 80-den gowrak ýokary okuw jaýyndan 200-den gowrak wekil gatnaşýar.
Açylyş dabarasyna Özbegistan Respublikasynyň Prezidentiniň Diwanynyň ýolbaşçysynyň orunbasary Ilhom Sirajew, ýokary bilim, ylym we innowasiýalar ministri Kungratbaý Şaripow, saglygy goraýyş ministri Asilbek Hudoýarow, Ýewropa Bileleşiginiň Özbegistandaky ilçisi Toýwo Klaar, Polşanyň ylym we ýokary bilim ministri Marsin Kulasek, Täjigistanyň bilim we ylym ministri Saidzoda Rahim Hamro, Polşanyň akademiki ýokary okuw jaýlarynyň rektorlar maslahatynyň (CRASP) prezidenti Bogumila Kanewska, şeýle hem «IREG Academic Ranking & Excellence Observatory» guramasynyň prezidenti Waldemar Siwinski gatnaşdy.
Gatnaşyjylar bilim we ylym ulgamyndaky hyzmatdaşlygy giňeltmäge hem-de çuňlaşdyrmaga gönükdirilen birnäçe başlangyçlar we teklipler bilen çykyş etdiler.
Bu kongresiň 2025-nji ýylyň 3-4-nji aprelinde Samarkantda geçirilen we sebitleriň arasyndaky strategik hyzmatdaşlygyň ugruny kesgitlän ilkinji «Merkezi Aziýa – Ýewropa Bileleşigi» sammitinde gazanylan ylalaşyklaryň dowamy bolandygy bellenilýär.
Çalt üýtgeýän global şertlerde bilim we ylym ulgamy halkara integrasiýasynyň esasy faktory hökmünde görülýär. Şunuň bilen baglylykda, kongres Ýewropa Bileleşigi bilen Merkezi Aziýa ýurtlarynyň arasynda ulgamlaýyn we institusional akademiki hyzmatdaşlygy ösdürmegi maksat edinýär.