Hormatly Prezidentimiz Serdar Berdimuhamedow Türkmenistanyň Garaşsyzlygynyň 34 ýyllygy mynasybetli döwrebaplaşdyrylan Aşgabat atçylyk sport toplumynda guralan baýramçylyk dabaralaryna gatnaşdy. Şu gezekki baýramçylyk at çapyşygynyň döwrebaplaşdyrylan atçylyk sport toplumynda geçirilmeginiň aýratyn many-mazmuna eýedigini bellemek gerek. Ýurdumyzyň Garaşsyzlygynyň ilkinji ýyllaryndan bäri bu ýerde şanly seneler mynasybetli dürli at çapyşyklary geçirilip gelinýär.
Mukaddes Garaşsyzlygymyzyň 34 ýyllyk baýramy, asylly däbe görä, şowhunly toýhanany ýada salýan baýramçylyk at çapyşyklary bilen jemlendi. Olaryň geçirilen ýerinde, ýagny Aşgabat atçylyk sport toplumynda paýtagtymyzyň, Arkadag şäheriniň hem-de ähli welaýatlaryň sungat ussatlarynyň çykyşlary, şekillendiriş sungatynyň ajaýyp eserleriniň, milli gymmatlyklarymyzyň sergi diwarlyklary toýçy märekä ruhy lezzet paýlady. Aýdym-sazly dabaralardan soňra, behişdi bedewlerimiziň janköýerleriniň sabyrsyzlyk bilen garaşýan at çapyşyklaryna badalga berildi.
Baýramçylyk at çapyşygynda ilkinji üç çapuwda ýelden ýyndam üç ýaşar bedewlere atlanan ussat çapyksuwarlar 1 müň 600 metrden, dördünji çapyşykdan başlap, bäsleşige dört hem-de uly ýaşar bedewler goşulyp, olar hem 1 müň 600 metr, altynjy, ýedinji çapyşyklarda aýlaw baglan dört we uly ýaşar atlar 2 müň 200 metr aralykda ýaryşa goşuldylar.
Bezirgen diýen bedewimi Türkmenistanyň at gazanan atşynasy Maksatmyrat Agamyradow seýisledi. Ula goşulan saýlama bedewleriň bary ýyndam atlardy. Şonuň üçin ýelden ýyndam dört we uly ýaşar aýlaw baglan bedewler badalgadan çykan badyna ýaryş gyzgalaňly ýagdaýa eýe boldy. Çapuwyň dowamynda meniň esasy garşydaşym 4-nji belgide ýaryşa goşulan Daýanjym diýen dor at boldy. Arzyly pellehana golaý gelende, çapyksuwarlar bedewlerini gyssap, elde baryny etdiler, ýöne çapyşyklarda ençeme gezek janköýerlerine şatlyk getiren Bezirgen diýen akýal mele atym nobatdaky gezek beýleki bedewlerden dyzynyň kuwwatlydygyny görkezdi.
Soňra ýeňijileri sylaglamak dabarasy boldy. Olar döwlet Baştutanymyza we Gahryman Arkadagymyza ýurdumyzda atçylyk sportuny ösdürmek babatda hemmetaraplaýyn alada edýändigi üçin tüýs ýürekden hoşallyk bildirip, behişdi bedewleriň Ýer ýüzündäki şöhratyny artdyrmak ugrunda yhlas-başarnyklaryny gaýgyrmajakdyklaryna ynandyrdylar.