Şu gün — 28-nji aprelde Arkadag şäherinde Ykdysady Hyzmatdaşlyk Guramasynyň durnukly ösüş boýunça ministrler derejesindäki birinji forumy geçirildi.
Foruma Ykdysady Hyzmatdaşlyk Guramasynyň Baş sekretary Asad Majid Han, Täjigistan Respublikasynyň ykdysady ösüş we söwda ministri Zawki Zawkizoda, Pakistan Yslam Respublikasynyň
meýilleşdiriş, ösüş we ýörite başlangyçlar boýunça federal ministri Ahsan Ykbal, Özbegistan Respublikasynyň Premýer-ministriniň orunbasary Açylbaý Rahmatow, Gazagystan Respublikasynyň
Premýer-ministriniň orunbasary Galymjan Koýşybaýew, Eýran Yslam Respublikasynyň
wise-prezidenti, Meýilleşdiriş we býujet soraglary boýunça guramasynyň başlygy Hamid Purmohammadi, Azerbaýjan Respublikasynyň Türkmenistandaky Adatdan daşary we Doly ygtyýarly ilçisi Gismat Gozalow, Gyrgyz Respublikasynyň ykdysadyýet we söwda ministriniň orunbasary Gülşat Asylbaýewa we Ykdysady Hyzmatdaşlyk Guramasynyň dürli gaznalarynyň ýolbaşçylary gatnaşdy.
Hormatly Prezidentimiziň Ykdysady Hyzmatdaşlyk Guramasynyň durnukly ösüş boýunça ministrler derejesindäki birinji forumyna gatnaşyjylara Gutlagy bu ýere gelenleriň ruhubelentligini artdyrdy. Hormatly Prezidentimiz: «Türkmenistan Durnukly ösüş maksatlary boýunça hyzmatdaşlyk etmekde oňyn syýasaty alyp barýar, halkara gatnaşyklary giňeltmekde netijeli çäreleri görýär» diýen sözleri mähriban Watanymyzda bu ugurda amal edilýän işleriň geljekde hasam rowaçlanjakdygyny, dünýä halklary bilen hyzmatdaşlygyň hasam giňejekdigini aýan edýär.
Halkara parahatçylyk we ynanyşmak ýylynyň taryhy wakalarynyň üstüni ýetiren forumda Birleşen Milletler Guramasynyň Baş Assambleýasy tarapyndan kabul edilen 2030-njy ýyla çenli döwür üçin durnukly ösüş ulgamyndaky Gün tertibiniň ýurdumyzyň durmuş-ykdysady ösüşiniň strategiýasy bolup durýandygy barada pikir alyşmalar boldy.
Ykdysady Hyzmatdaşlyk Guramasynyň durnukly ösüş boýunça ministrler derejesindäki birinji forumy bölümçelerde dowam etdi.