Türkmenistanyň halky her bir täze ýyly belent maksatlar we şanly wakalar bilen garşylaýar. Häzirki döwürde ýurdumyzda her ýyla döwrebap at bermek asylly däbe öwrüldi.
Şu nukdaýnazardan, «Garaşsyz, baky Bitarap Türkmenistan — bedew batly at-myradyň mekany» diýlip yglan edilen ýyl halkymyzyň ruhyalkynjylygyny belende göterýän, döwletimiziň ösüşleriniň täze tapgyryny alamatlandyrýan taryhy döwürdir.
Türkmenistanyň Mejlisi tarapyndan kabul edilen karara laýyklykda, 2026-njy ýyl «Garaşsyz, baky Bitarap Türkmenistan — bedew batly at-myradyň mekany» ýyly diýip yglan edildi. Bu şygar Garaşsyzlygyň we hemişelik Bitaraplygyň döwletimiziň ösüş ýolundaky binýatlyk ýörelge hökmünde ornuny görkezýär, şeýle-de ýurduň ähli ugurlarda bedew bady bilen öňe barýan ösüşlerini beýan edýär.
Garaşsyzlyk ýyllarynda ýetilen belent sepgitler, halkymyzyň agzybirligi we döwletimiziň dünýä derejesindäki abraýy baky Bitaraplyk syýasaty bilen berk baglanyşyklydyr. Şol syýasatyň netijesinde Türkmenistan halkara giňişlikde parahatçylyk dörediji, ynamdar hyzmatdaş hökmünde tanalýar. Täze ýylyň şygary hem hut şu ösüş ýolunyň dowam etdirilýändigini alamatlandyrýar.
2026-njy ýylyň şygarynyň esasy maksady Garaşsyzlygyň gazanan üstünliklerini giňden wagyz etmek, milli gymmatlyklary gorap saklamak, ýaş nesli watançylyk, milli buýsanç ruhunda terbiýelemekden ybaratdyr. Şeýle-de Garaşsyzlygyň 35 ýyllyk şanly senesini mynasyp garşylamak bu şygaryň möhüm many-mazmunyny düzýär.
«Bedew batly at-myradyň mekany» diýen many-mazmun milli buýsanjymyzyň nyşany bolan ahalteke bedewleriniň şöhratyny, türkmen halkynyň gadymy atçylyk däplerini hem-de ösüşe ymtylýan ruhy güýjüni özünde jemleýär. Bedew bady bilen öňe barýan ösüşler ykdysadyýetiň, ylym-bilimiň, medeniýetiň we jemgyýetçilik durmuşynyň ähli ugurlarynda aýdyň duýulýar.
Berkarar döwletiň täze eýýamynyň Galkynyşy döwründe Türkmenistanda atçylygy we atçylyk sportuny ösdürmäge, tejribeli atşynaslary, seýisleri, çapyksuwarlary, beýleki hünärmenleri taýýarlamaga, olaryň ýaşaýyş-durmuş derejesini ýokarlandyrmak üçin ähli zerur şertleri döretmäge aýratyn üns berilýär. Şunuň bilen bir hatarda, ata-babalarymyzyň atşynaslyk däpleri gaýtadan dikeldilýär, türkmen atşynaslyk sungaty täze sepgitlere ýetýär. Ýyndamlygy we owadanlygy bilen bütin dünýäde tanalýan behişdi bedewleriň meşhurlygy barha artýar. Ajaýyp türkmen atlaryna bolan ägirt uly gyzyklanmany göz öňünde tutup, daşary ýurtlardaky ahalteke atçylyk assosiasiýalary bilen netijeli hyzmatdaşlyk ýola goýulýar. Türkmen atçylyk sungatynyň dünýä giňişligine işjeň goşulyşmagy ştab-kwartirasy Aşgabatda ýerleşýän Halkara ahalteke atçylyk assosiasiýasynyň işinde aýdyň beýanyny tapýar. Geçen ýylda bu düzüm Ýewropanyň we Aziýanyň öňdebaryjy atçylyk merkezleri bilen bilelikdäki ylmy-barlag taslamalarynyň birnäçesini durmuşa geçirip, hyzmatdaşlygynyň çägini ep-esli giňeltdi. Bu netijeli dialog diňe bir tohumçylyk ulgamynda tejribe alyşmaga ýardam bermek bilen çäklenmän, eýsem, ýurdumyzyň bedewleriň genofonduny gorap saklaýan, ykrar edilen halkara derejeli intellektual we medeni merkez hökmündäki abraýyny hem pugtalandyrýar.
Türkmen halkynyň Milli Lideriniň başlangyçlary, köpugurly döredijiligi netijesinde häzirki wagtda ahalteke atlarynyň dünýä derejesindäki abraýynyň barha artýandygynyň şaýady bolýarys. Olaryň ÝUNESKO tarapyndan ykrar edilmegi we Arkadag şäherinde öňdebaryjy Atçylyk ylmy-önümçilik merkeziniň gurulmagy munuň aýdyň güwäsidir. «Ahalteke atçylyk sungaty we atlary bezemek däpleri» atly milli hödürnamanyň ÝUNESKO-nyň Adamzadyň maddy däl medeni mirasynyň sanawyna girizilmegi bu ugurdaky döwlet syýasatynyň möhüm üstünligi boldy.
Asyrlaryň dowamynda ahalteke atlaryna goýulýan belent hormat häzirki wagtda Türkmenistanda döwlet derejesinde dowam etdirilýär. Behişdi bedewler ýurdumyzda milli özboluşlylygyň nyşany bolup hyzmat edýär. Bu ugurda milli infrastrukturanyň ösdürilmegi, ähli welaýatlarda iň täze tehnologiýalar bilen enjamlaşdyrylan atçylyk merkezleriniň, awtomatlaşdyrylan howa gözegçilik ulgamlary bilen üpjün edilen athanalaryň, ýokary tehnologiýaly weterinariýa hassahanalarynyň, genetiki gözegçilik barlaghanalarynyň gurulmagy munuň anyk mysalydyr.
Şeýlelikde, 2026-njy ýylyň şygary Garaşsyz, baky Bitarap Türkmenistanyň parahatçylyk, ösüş we döredijilik ýoluna ygrarlydygyny, döwletimiziň geljege ynamly gadam urýandygyny aýdyň görkezýär. Bu şygar her bir raýaty täze üstünliklere ruhlandyryp, Watana bolan buýsanjy has-da belende göterýär.
Aýna Abaýewa,
Türkmen döwlet medeniýet we sungat mekdebiniñ kitaphanaçylyk işi bölüminiñ mugallymy.