Baklawa gelip çykyşy Türkiýeden bolup, bütin dünýä ýaýran, diňe bir süýji tagam däl – ol hakykatdan-da aşpezçilik sungatynyň nusgalyk eseridir. Köp sanly gatlakly hamyry, altynsow reňkli ýüzü we ýeňil bally şerbeti bilen bu süýjülik häzirki wagtda halkara derejesinde giňden ykrar edildi. ABŞ-da, Ýewropada we Ýaponiýada türk konditerleriniň öňünde emele gelýän uzyn nobatlar onuň dünýä derejesindäki meşhurlygyna şaýatlyk edýär.
Emma baklawanyň hakyky tagamyny duýmagyň iň dogry ýoly – ony öz watanynda datmakdyr, esasan-da her ýylyň 17-nji noýabrynda bellenilýän bütindünýä baklawa gününde datmak has-da özboluşlydyr.
“Ýufka” diýlip atlandyrylýan kyrk gatly hamyrdan taýýarlanylýan, üsti hoz ýa-da pisse bilen bezelen we ýeňil şerbet bilen siňdirilen bu desert asyrlardan bäri türk aşhanasynyň iň gymmatly hazynalarynyň biri bolup gelýär. Onuň kökleri ýuka hamyr taýýarlaýyş däbine barýar, bu bolsa ÝUNESKO-nyň sanawyna hem girizilendir. Osman imperiýasynyň köşgüniň aşpezleri hamyry inçe ýazmak ukybyny ýokary ussatlyk we mertebe hasaplaýardylar.
Häzirki wagtda Türkiýede baklawa baýramçylyklaryň, myhman kabul edişlikleriniň hem-de maşgala agşamlarynyň aýrylmaz bir bölegine öwrülip, hakykatdan-da şatlygyň nyşanyna öwrüldi.
Baklawanyň iň kämil, nusgalyk görnüşi Gaziantep şäherinde taýýarlanýar. Bu şäher ÝUNESKO-nyň döredijilik şäherleriniň aşpezçilik ulgamy boýunça sanawyna girýär.
Baklawa – Türkiýäniň dünýä peşgeş beren medeni mirasynyň iň süýji nyşanydyr.