Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň mejlisini geçirdi. “Watan” habarlar gepleşiginde bellenilip geçilişi ýaly, mekdep harytlarynyň söwdasyny guramak boýunça alnyp barylýan işler barada hasabat berildi.
Türkmenistanda Söwda we daşary ykdysady aragatnaşyklar ministrliginiň söwda düzümleri tarapyndan okuwçylar we talyplar üçin harytlary öndürijiler we iberijiler bilen bilelikde ýurdumyzyň bazarlaryny okuw esbaplary, okuwçy we sport egin-eşikleri, aýakgaplary we beýleki harytlar bilen üpjün etmek boýunça degişli işler alnyp barylýar.
Ýurdumyzyň welaýatlarynda we etraplarynda, şeýle hem paýtagtymyzda we Arkadag şäherinde mekdep harytlarynyň söwdasyny şu ýylyň 1-nji awgustyndan başlap, 5-nji sentýabra çenli geçirmegiň meýilleşdirilýändigi bellenildi.
Mekdep bazarlary birnäçe ýyldan bäri her ýylyň awgust aýynda gurnalyp, sentýabr aýynyň başyna çenli dowam edip gelýär. Ýaşyl we ak köýnekler, tahýalar, dürli görnüşli mekdep torbalary, depderdir gündelikler we beýleki mekdep esbaplary bu bazarlaryň esasy harytlary bolup durýar.