Paýtagtymyzdaky «Arçabil» myhmanhanasynda «Halkara zähmet standartlaryny we durnukly ösüşi öňe sürmekde kärdeşler arkalaşyklarynyň orny» atly halkara ylmy-amaly maslahat geçirildi. Ol Türkmenistanyň Kärdeşler arkalaşyklarynyň Milli merkezi hem-de Halkara Zähmet Guramasynyň (HZG) Zähmetkeşleriň işleri boýunça edarasy tarapyndan bilelikde guraldy.
Halkara maslahata BMG-niň ýöriteleşdirilen edaralaryndan, Halkara Zähmet Guramasyndan, Kärdeşler arkalaşyklarynyň halkara konfederasiýasyndan, Bütindünýä kärdeşler arkalaşyklary federasiýasyndan, Merkezi Aziýa ýurtlarynyň, Azerbaýjan, Türkiýe, Gruziýa, Koreýa Respublikasy we Mongoliýa döwletleriniň kärdeşler arkalaşyklarynyň 40-a golaý wekili gatnaşdy.
Maslahatda edilen çykyşlarda halkara hyzmatdaşlygyň ösdürilmeginiň, daşary ýurtlaryň ugurdaş düzümleri we Halkara Zähmet Guramasy bilen gatnaşyklaryň pugtalandyrylmagynyň Türkmenistanyň Kärdeşler arkalaşyklarynyň Milli merkeziniň işiniň möhüm ugry bolmagynda galýandygy aýratyn nygtaldy.
Halkara Zähmet Guramasynyň, BMG-niň Ösüş maksatnamasynyň, Kärdeşler arkalaşyklarynyň halkara konfederasiýasynyň, Bütindünýä kärdeşler arkalaşyklary federasiýasynyň, Merkezi Aziýa, Azerbaýjan, Türkiýe, Gruziýa, Koreýa Respublikasy we Mongoliýa döwletleriniň wekilleri Aşgabatdaky duşuşyklaryň ýokary guramaçylygy üçin türkmen tarapyna tüýs ýürekden hoşallyk bildirdiler. Olaryň nygtaýşy ýaly, halkara ylmy-amaly maslahatyň geçirilmegi Türkmenistanyň zähmet bazarynda umumy ykrar edilen düzgünleri ornaşdyrmaga, bar bolan kadalaşdyryjy hukuk namalary ösen halkara tejribäniň esasynda kämilleşdirmäge hem-de degişli ugurda halkara hyzmatdaşlygy işjeňleşdirmäge çalyşýandygyny aýdyň görkezýär. Şu gezekki duşuşyk halkara zähmet standartlaryny diňe bir milli derejede däl, eýsem, sebit möçberinde hem ilerletmekde bilelikdäki çemeleşmeleri işläp taýýarlamak üçin amatly meýdança bolup durýar.