Ýewropanyň öňdebaryjy futbol çempionatlary futbol janköýerlerini has-da gyzyklandyrýar. Esasan hem köplenç hepdäniň şenbe hem-de ýekşenbe gününde oýnalýan duşuşyklar “mawy ekran” arkaly hem köp sanly tomaşaçyny özünde jemleýär.
Ýewropanyň öňdebaryjy ýurtlary – Angliýanyň, Ispaniýanyň, Italiýanyň, Fransiýanyň hem-de Germaniýanyň milli çempionatlarynyň soňky tapgyry barada gysgaça syn bermegi makul bildik.
Angliýanyň çempionaty: “VAR” ulgamy “Liwerpulyň” ýeňşini elinden aldy, “Tottenhemiň” şowsuzlygy…
Futbol janköýerleriniň iň köp tomaşa edýän ligasy hasaplanýan Angliýanyň “Premýer Ligasynda” 5-nji tapgyryň duşuşyklary geçirildi. Bu tapgyryň esasy oýunlary “Liwerpul” bilen “Ewertonyň” arasyndaky Mersisaýd derbisi hem-de “Mançester Siti” bilen “Arsenalyň” duşuşygy boldy.
“Liwerpul” bilen “Ewertonyň” arasyndaky duşuşykda gynandyryjy iki waka boldy. 2:2 hasap bilen tamamlanan duşuşykda “Liwerpuldan” Hendersonyň goly hasap edildi. “VAR” ulgamy gol pasyny beren Sadio Maneniň ofsaýtda galandygyny görkezdi. Emmä ýagdaý beýle däldi. Şonuň netijesinde, bu tehnologik ulgam “Liwerpulyň” ýeňşini elinden aldy. Şeýle hem bu duşuşykda “Liwerpulyň” ökde goragçysy Wirjil Wan Deýk hem şikes aldy. Onuň bu şikesiň uzak wagta çekjekdigi aýdylýar.
Çempionatyň merkezi duşuşyklarynyň birinde “Mançester Siti” bilen “Arsenaly” 1:0 hasabynda utdy. Ýatda galyjy duşuşyklaryň biri “Tottenhem” bilen “West Hem” toparynyň arasynda boldy. “Tottenhem” duşuşygyň ilkinji minutlarynda tapawutlanyp, eýýäm 16-njy minutda 3:0 hasabynda öňe geçen “Tottenhem” topary 82-nji hem-de 94-nji minutlaryň arasynda 3 jogapsyz pökgileri derwezesinden geçirip, ýeňşini baýram edip bilmedi.
Çempionatda gowy oýun görkezip bilmeýän “Mançester Ýunaýted” topary bu gezek “Nýukasly” 4:1 hasabynda utdy. Köp sanly täze futbolçylary düzümine goşan “Çelsi” bolsa deňme-deň oýnady.
Angliýanyň çempionatynda 5 tapgyryň çäklerinde 46 duşuşyk geçirildi we 171 pökgi tora girizildi. Her bir oýun üçin ortaça gol 3,72-ä deňdir. Bu soňky 60 ýylyň iň gowy görkezijisidir. 5 tapgyryň dowamynda “Tottenhem” topary 15 gol geçirdi.
5 tapgyrdan soňra çempionatda 13 utuk bilen “Ewerton” topary birinji orunda barýar.
Ispaniýanyň çempionaty: “Real” we “Barselona” ýeňildi
Ispaniýanyň “La Liga” çempionatynda 6-njy tapgyrda garaşylmadyk netijeler gazanyldy. Bir günüň dowamynda dünýäniň iki güýçli topary “Real Madrid” hem-de “Barselona” garşydaş toparlaryndan 1:0 hasabynda utuldy. Şeýle ýagdaý 20 ýyldan bäri bolmandy. “Real Madrid” topary “La Liga” çempionatyna täze goşulan “Kadis” toparyndan utulan bolsa, “Barselona” bolsa “Getafe” toparyndan utuldy. “Barselona” toparynyň tälimçisi Ronald Kuman tälimçi wezipesinde ilkinji gezek ýeňildi.
Indiki hepde bolsa, “Real Madrid” bilen “Barselona” toparlarynyň arasyndaky “El Klasiko” duşuşygy bolar.
Ispaniýada “Atletiko Madrid” topary bolsa ýeňişli ýoluny dowam etdirýär. Bu toparda “Barselonadan” gelen Luis Suares yzygiderli tapawutlanýar. Toparyň tälimçisi Diego Simeone 330 duşuşykda 200-nji ýeňşini baýram etdi. Ol bu topara 2011-nji ýyldan bäri tälim berýär. Luis Suares “La Liga” çempionatyndaky 150-nji goluny geçirdi.
Bu çempionatda 11 utuk bilen “Real sosýedad” topary öňde barýar.
Italiýanyň çempionaty: Milan derbisi hepdäniň duşuşygy boldy
Italiýanyň “Serie A” çempionatynda hepdäniň duşuşygy Milan şäheriniň iki topary “Milan” bilen “Interiň” arasynda boldy. Bu duşuşykda Zlatan Ibragimowiçiň 2 goly bilen “Milan” topary ýeňiş gazandy. Çempionatyň ökde toparlaryndan “Ýuwentus” topary “Krotone” topary bilen 1:1 deňme-deň oýnady.
Geçen möwsümde Çempionlar ligasynda hem-de ligada oňat oýunlar görkezen “Atalanta” topary “Napoliden” 4:1 hasabynda utuldy. Bu hem garaşylmadyk netije boldy.
Bu çempionatda 4 tapgyrdan soňra 12 utuk bilen “Milan” öňde barýar.
Fransiýanyň çempionaty: “PSŽ” ýene-de öňdelige ymtylýar
Fransiýanyň “Ligue 1” çempionatynda bolsa geçen ýyllaryň çempiony “PSŽ” topary ýene-de öňe ymtylmaga başlady. 7 tapgyryň ahyrynda bu topar utuk sanyny 15-e çykardy. Öňdeligi bolsa 17 utuk bilen “Lill” topary eýeleýär.
Germaniýanyň çempionaty: “Bawariýa” topary birinjilige barýar
Germaniýanyň “Bundesliga” çempionatynda geçen ýylyň çempiony “Bawariýa” topary ýene-de birinjilige tarap ynamly ädim ädýär. Topar 4-nji tapgyrda “Arminiýa” toparyny 4:1 hasabynda utdy. Çempionatyň güýçli toparlaryndan “Borussiýa Dortmund”bolsa “Hoffenhaým” toparyny 1:0 hasabynda ýeňdi.
Germaniýanyň çempionatynyň 4-nji tapgyrynyň beýleki oýunlarynda “RB Leipsig” topary “Aýgsburg” toparyny (2: 0) ýeňdi, “Herta” topary “Ştutgartdan” (0: 2), “Maýns” topary “Baýer Lewerkuzenden” (0:1) ýeňildi, “Fraýburg” we “Werder Bremen” toparlary (1: 1) deňme-deň oýnadylar.
Häzirlikçe Germaniýanyň çempionatynda 4 tapgyrdan soňra “Leipsig” topary 10 utuk bilen birinji barýar.
Ýurdumyzyň gözel künjegine degişli fotosuratlary bu sahypadan tapyp bilersiňiz!
