Ýaponiýanyň Premýer-ministriniň ýörite geňeşçisi Akihisa Nagasima hökümet başlygynyň ýörite wekili hökmünde Merkezi Aziýa ýurtlarynda saparda bolar. 11 günlük bu sapar Merkezi Aziýanyň 5 döwletini öz içine alyp, Ýaponiýanyň sebit hyzmatdaşlygyna berýän ähmiýetini görkezýär.
Ýapon myhmanynyň sapary 29-njy ýanwar-8-nji fewral aralygynda bolup, ol Gazagystanda, Gyrgyzystanda, Täjigistanda, Türkmenistanda we Özbegistanda saparda bolar. Ýaponiýanyň Daşary işler ministrliginiň metbugat beýanatyna görä, Akihisa Nagasima saparynyň çäklerinde ýokary derejede gepleşikler geçirer.
Gün tertibiniň esasy wakalaryny ikitaraplaýyn gatnaşyklary pugtalandyrmak hem-de öňde boljak “Merkezi Aziýa+Ýaponiýa” dialogynyň sammitiniň çäklerinde hyzmatdaşlyk gatnaşyklaryny ösdürmek meseleleri eýelär. Şeýle hem halkara we sebit meseleleri boýunça pikir alşylar.
Bu diplomatik sapar Ýaponiýanyň Merkezi Aziýa ýurtlary bilen hyzmatdaşlygynda möhüm ädim bolup, Günüň dogýan ýurdunyň sebitde hyzmatdaşlygy pugtalandyrmaga berýän ähmiýetini görkezýär. “Merkezi Aziýa +Ýaponiýa” dialogy Ýaponiýa bilen Merkezi Aziýa ýurtlarynyň arasynda köptaraplaýyn hyzmatdaşlygyň möhüm platformasy bolup hyzmat edýär.