Täze okuw ýylynda ýokary okuw mekdeplerine kabul ediljekleriň sany geçen ýyldaka garanyňda iki müň adamdan hem köpdür ― diýip, «Mugallymlar gazeti» gazeti ýurdumyzyň ýokary okuw mekdeplerine täze girizilen hünärler barada maglumat berdi. Eýsem, olar haýsy hünärlerkä, geliň tanyş bolalyň!.
― Magtymguly adyndaky Türkmen döwlet uniwersitetinde ozalky taýýarlanylýan hünärleriň üstüne rus dili we edebiýaty hünäri goşuldy. Galyberse-de, şu ýokary okuw mekdebinde matematika we mehanika taýýarlygynyň ugurlary boýunça amaly matematika we informatika; informatika we hasaplaşyk tehnikasy ugry boýunça maglumat ulgamlary we tehnologiýalary hünärlerinden bakalawrlar taýýarlanylýar.
― S.A.Nyýazow adyndaky Türkmen oba hojalyk uniwersitetinde ozalky taýýarlanylýan ýigrimi alty hünäriň üstüne ýene dördüsi goşuldy. Hususan-da, weterinariýa we zootehniýa ugrunda: zootehniýa; atçylyk; senagat balykçylygy; kinologiýa hünärlerinden bakalawrlar taýýarlanylýar. Şu ýokary okuw mekdebinde halkara derejeli bakalawrlary taýýarlamak işiniň täze okuw ýylyndan başlanýandygyny bellemekçidiris.
― Seýitnazar Seýdi adyndaky Türkmen döwlet mugallymçylyk institutynda dil bilimi we edebiýaty öwreniş ugry boýunça: nemes dili we edebiýaty; pars dili we edebiýaty hünärlerinden ýokary derejeli hünärmenler taýýarlanylar.
― Döwletmämmet Azady adyndaky Türkmen milli dünýä dilleri institutynda italýan dili hem-de terjime we terjimeçilik işi (rus dili) hünäri ugrundan hünärmenler taýýarlanylar.
Ýokary okuw mekdepleriniň dalaşgärlerden resminamalary kabul ediş iş topary häzirki wagtda dalaşgärleriň resminamalaryny höwes bilen kabul edýärler. Toparyň işgärleri dalaşgärlere resminamalaryny doldurmaga, gerekli kagyzlaryny toplamaga konsultatiw we amaly kömekleri berýärler. Tutumyňyz şowly bolsun, dalaşgärler!