Ozal hem habar berşimiz ýaly, Türkmenistanyň wekiliýeti Gruziýanyň Tbilisi şäherinde geçirilen Ýüpek ýoly forumyna gatnaşdy. Türkmenistanyň Gruziýadaky ilçihanasynyň habar bermegine görä, bu foruma gatnaşan Türkmenistanyň Ministrler Kabinetiniň ýanyndaky Ulag we kommunikasiýalar agentliginiň baş direktorynyň orunbasary B.Annaýew birnäçe ikiçäk duşuşyklary geçirdi.
Hususan-da, türkmen wekiliýeti Gruziýanyň ykdysadyýet we durnukly ösüş ministriniň orunbasary G.Guramişwili, Rumyniýanyň Ulag we infrastruktura ministrliginiň döwlet sekretary A.Fogis, “APM Terminalsyň” täjirçilik gatnaşyklary boýunça direktory Z.Çhartişwili, “MSC Georgianyň” dolandyryş direktory A.Aliçik bilen duşuşyklar geçirdi.
Duşuşyklarda söwda-ykdysady, ulag-energetika we maýa goýum ulgamlarynda hyzmatdaşlygy işjeňleşdirmek we giňeltmek babatda pikir alşyldy. Şeýle hem “Hazar deňzi-Gara deňiz” ulag üstaşyr geçelgesi taslamasyna aýratyn üns berildi.