Türkmenistanyň Prezidenti Serdar Berdimuhamedow ýurdumyza resmi sapar bilen gelen Türkiýe Respublikasynyň daşary işler ministri Hakan Fidany kabul etdi.
“Watan” habarlar gepleşiginde bellenilip geçilişi ýaly, duşuşykda iki ýurduň arasyndaky syýasy, söwda-ykdysady, medeni-ynsanperwer ugurlardaky hyzmatdaşlyk gatnaşyklary ara alnyp maslahatlaşyldy.
Şeýle hem duşuşykda bellenilip geçilişi ýaly, Türkmenistanyň Prezidentiniň ýakyn wagtda Türkiýe Respublikasyna amala aşyrjak saparynyň döwletara gatnaşyklaryny has-da ösdürmäge giň mümkinçilikleriň döretjekdigi bellenildi.
Duşuşykdan soňra habarçylara beren beýanatynda Türkiýe Respublikasynyň daşary işler ministri Hakan Fidan daşary syýasat edarasynyň ýolbaşçysy hökmünde Türkmenistana ilkinji saparyny amala aşyrandygyny belledi.
Hakan Fidan Türkmenistanyň Türkiýäniň diňe bir doganlyk ýurt bolmak bilen çäklenmän, eýsem iň ýakyn hyzmatdaşlarynyň hem biridigini belledi.
Türkiýäniň daşary syýasat edarasynyň ýolbaşçysy Türkmenistanyň Prezidentiniň ýakyn wagtda Türkiýe Respublikasyna amala aşyrjak saparyna görülýän taýýarlyk işleri barada maglumat berendigini belläp, Türkiýe Respublikasynyň Türkmenistan bilen ýakyn gatnaşyklary dowam etdirmäge uly ähmiýet berýändigini mälim etdi.
Hakan Fidan iki doganlyk ýurtlaryň arasynda söwda-ykdysady gatnaşyklara-da uly üns berilýändigini, hususan-da, energetika pudagy boýunça özara bähbitli hyzmatdaşlygy ilerletmäge häzirki döwürde aýratyn ähmiýet berilýändigini belledi.