«Merkezi Aziýa + Ýaponiýa» Dialogynyň çäreler maksatnamasynyň dowamy hökmünde Türkmenistanyň Prezidenti Serdar Berdimuhamedow köptaraplaýyn işewürler forumyna gatnaşdy.
Çärä Ýaponiýanyň Premýer-ministri Sanae Takaiti, Gazagystan Respublikasynyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, Täjigistan Respublikasynyň Prezidenti Emomali Rahmon we Özbegistan Respublikasynyň Prezidenti Şawkat Mirziýoýew hem gatnaşandygy bellenildi.
Forumda Merkezi Aziýa bilen Ýaponiýanyň arasyndaky söwda-ykdysady hyzmatdaşlygy ösdürmegiň, sebite ýapon maýa goýumlaryny we öňdebaryjy tehnologiýalary çekmegiň, senagat kooperasiýasyny giňeltmegiň hem-de işewür toparlaryň arasynda göni gatnaşyklary berkitmegiň möhüm meseleleri ara alnyp maslahatlaşyldy.
Şeýle hem bu foruma Merkezi Aziýa ýurtlaryndan we Ýaponiýadan takmynan 300 işewür wekili gatnaşdy. Olar senagat we maşyn gurluşygy, energetika, ulag we logistika, maliýe we ätiýaçlandyryş, maglumat tehnologiýalary, lukmançylyk we farmasewtika, oba hojalygy, bilim, şeýle hem ýokary tehnologiýalar we innowasion ösüş ýaly giň ugurlary wekilçilik etdiler.
Forumyň işewürlik maksatnamasynyň çäginde hyzmatdaşlygyň ileri tutulýan ugurlary ara alnyp maslahatlaşyldy. Olaryň arasynda durnukly ösüş, «ýaşyl» ykdysadyýeti emele getirmek, sanlylaşdyrmak, IT-senagatyny ösdürmek, şeýle-de adam kapitalyny we bilim ulgamyny ösdürmek bilen bagly meseleler bar.
Bilelikdäki ykdysady taslamalar tanyşdyryldy.
Liderleriň gatnaşmagynda degişli taslamalar boýunça resminamalaryň dabaraly alyş-çalşygy geçirildi.