Şu gün Saud Arabystanyda iş saparynda bolýan Türkmenistanyň Prezidenti Serdar Berdimuhamedow Aýlagdaky arap döwletleriniň hyzmatdaşlyk geňeşine agza ýurtlaryň hem-de Merkezi Aziýa döwletleriniň Baştutanlarynyň duşuşygyna gatnaşdy. Bu barada arap neşirleri habar berýär.
Aýlagdaky arap döwletleriniň hyzmatdaşlyk geňeşine agza ýurtlar bilen Merkezi Aziýa döwletleriniň Baştutanlarynyň sammitine Gazagystanyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, Özbegistanyň Prezidenti Şawkat Mirziýoýew, Täjigistanyň Prezidenti Emomali Rahmon hem gatnaşdy.
Şeýle hem sammite Aýlagdaky arap döwletleriniň hyzmatdaşlyk geňeşine agza ýurtlar bolan Saud Arabystany Patyşalygynyň mirasdüşer şazadasy Mohammed bin Salman bin Abdelaziz Al Saud, Kataryň Emiri Tamim bin Hamad Al Tani, Kuweýt döwletiniň mirasdüşer şazadasy Şeýh Mişal Al-Ahmad Al-Jaber Al-Sabah, Bahreýn Patyşasynyň ýörite wekili, Patyşa maşgalasynyň agzasy Nasser bin Hamad Al Halifa, BAE-niň wise-prezidenti Şeýh Mohammed bin Raşid Al Maktum gatnaşdy.
Saud Arabystany Patyşalygynyň mirasdüşer şazadasy Mohammed bin Salman bin Abdelaziz Al Saud sammiti açmak bilen bu duşuşygyň Merkezi Aziýa döwletleri bilen ozaldan gelen gatnaşyklaryň pugtalandyrylýandygynyň subutnamasy bolup durýandygyny belledi.
Şeýle hem Saud Arabystany Patyşalygynyň mirasdüşer şazadasy Saud Arabystanynyň 2030-njy ýylda Bütindünýä sergisini geçirmegi üçin Merkezi Aziýa ýurtlarynyň beren goldwy üçin minnetdarlyk bildirdi.
Ilkinji gezek geçirilýän şeýle ýokary derejedäki sammitiň dowamynda sebitleriň arasynda söwda-ykdysady, maýa goýum, mednei-ynsanperwer ugurlardaky gatnaşyklary ösdürmäge degişli meseleler ara alyp maslahatlaşyldy.
Ykdysady hyzmatdaşlyk barada aýdylanda, 2021-nji ýylda Aýlagdaky arap döwletleri bilen Merkezi Aziýa döwletleriniň arasynda haryt dolanyşygy 3,1 milliard dollara deň boldy. Şol döwürde Aýlagdaky arap döwletleriň Merkezi Aziýa ýurtlaryna eksporty 2.06 milliard dollara, importy bolsa, 1,03 milliard dollara deň boldy.
Aýlagdaky Arap Döwletleriniň Hyzmatdaşlyk Geňeşi — düzümine Bahreýn, Kuweýt, Oman, Katar, Saud Arabystany we Birleşen Arap Emirlikleri girýän sebitleýin hökümetara, syýasy we ykdysady bileleşikdir. Ştab-kwartirasy Saud Arabystanynyň paýtagty Er-Riýadda ýerleşen gurama 1981-nji ýylyň 25-nji maýynda döredildi.