Hormatly Prezidentimiz Serdar Berdimuhamedow Astanada geçirilen Merkezi Aziýa ýurtlarynyň döwlet Baştutanlarynyň we Germaniýa Federatiw Respublikasynyň Federal Kansleriniň ikinji sammitiniň çäklerinde Germaniýanyň öňdebaryjy kompaniýalarynyň we banklarynyň ýolbaşçylary bilen geçirilen duşuşyga gatnaşdy.
Duşuşyga Gazagystanyň Prezidenti Kasym-Žomart Tokaýew, Germaniýanyň Federal Kansleri Olaf Şols, Gyrgyz Respublikasynyň Prezidenti Sadyr Žaparow, Täjigistan Respublikasynyň Prezidenti Emomali Rahmon hem-de Özbegistan Respublikasynyň Prezidenti Şawkat Mirziýoýew gatnaşdy.
Germaniýanyň “KNAUF”, “Gunter Papenburg”, “CLAAS”, “Siemens Energy”, “Aurubis”, “Ernst Klett”, “Siemens Healthineers”, “Herrenknecht”, “DB Engineering & Consulting”, “Svevind Energy, Rhenus”, “HMS Bergbau” öňdebaryjy kompaniýalarynyň hem-de banklarynyň ýolbaşçylary wekilçilik etdi.
Foruma gatnaşan Merkezi Aziýanyň döwlet Baştutanlary Astanada geçirilen Merkezi Aziýa ýurtlarynyň döwlet Baştutanlarynyň we Germaniýa Federatiw Respublikasynyň Federal Kansleriniň ikinji sammitiniň netijelerine ýokary baha berip, Germaniýanyň iri kompaniýalary bilen hyzmatdaşlyk etmäge taýýardyklaryny beýan etdiler.
Gepleşikleriň netijeleri, Germaniýanyň öňdebaryjy tejribelerine we innowasion tehnologiki çözgütlerine esaslanýan bilelikdäki taslamalary durmuşa geçirmekde hyzmatdaşlygy çuňlaşdyrmakda işewürligiň özara gyzyklanmasynyň artýandygyny görkezdi.
Mälim bolşy ýaly, hormatly Prezidentimiz Astana şäherine amala aşyran iş saparynyň çäklerinde Germaniýanyň işewür toparlarynyň wekilleri bilen duşuşdy.