Owganystanyň Kabul şäherinde Owganystanyň, Türkmenistanyň we “Çalyk Holding” türk kompaniýasynyň wekilleriniň gatnaşmagynda üçtaraplaýyn duşuşyk geçirildi. Bu duşuşyk Türkmenistan-Owganystan-Pakistan elektrik geçirijisiniň TAP-500 elektrik geçiriji liniýasynyň amaly tapgyryna girişmek bilen bagly boldy. Bu barada owgan metbugaty habar berdi.
Duşuşygyň barşynda taraplar tehniki toparlaryň hem-de sekretariatlaryň arasynda yzygiderli duşuşyklaryň geçirilmeginiň ähmiýetini bellediler. Bu duşuşyklar TAP-500 taslamasynyň üstünlikli durmuşa geçirilmegi üçin möhüm bolar.
Owganystanyň “DABS” kompaniýasynyň hem-de Suw serişdeleri we energetika ministrliginiň wekillerinden ybarat bolan owgan topary energetika pudagynda sebitleýin hyzmatdaşlyga ygrarly bolup durýandyklaryny belledi.
“DABS” kompaniýasynyň baş ýerine ýetiriji direktory Abdul Bari Omar Türkmenistanyň Energetika ministrliginiň TOP ugry boýunça halkara elektroenergetika taslamalarynyň müdirliginiň başlygy Myrat Artykow hem-de “Çalyk Holding” komapniýasynyň wekilleri bilen aýratynlykda duşuşdy.
Owgan tarapy Türkmenistan bilen Owganystanyň arasyndaky hyzmatdaşlygyň mundan beýläk-de pugtalandyrylmagynyň möhümdigini belläp,”Çalyk Holding” komapniýasynyň wekillerine hünärmenleri tehniki tarapdan taýýarlamak babatda guramaçylygy üçin minnetdarlyk bildirdi.