Türkmenistanyň Prezidentiniň başlyklyk etmeginde geçirilen Ministrler Kabinetiniň giňişleýin mejlisinde ýanwar-noýabr aýlarynda ykdysayd görkezijilere seredildi.
Ministrler Kabinetiniň Başlygynyň orunbasarlary 2022-nji ýylyň ýanwar — noýabr aýlarynyň ykdysady görkezijileri barada hasabat berdiler.
- Bellenilişi ýaly, on bir aýyň jemleri boýunça jemi içerki önümiň ösüş depgini 6,2 göterim derejesinde durnukly saklanylýar.
- Geçen ýylyň degişli döwri bilen deňeşdirilende, önümleri öndürmegiň möçberi 11 göterim artdy.
- Hasabat döwründe bölek-satuw haryt dolanyşygynyň möçberi geçen ýylyň degişli döwri bilen deňeşdirilende, 10,6 göterim, daşary söwda dolanyşygy bolsa 35,7 göterim artdy.
- Maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň möçberi 2021-nji ýylyň degişli döwri bilen deňeşdirilende, 14,1 göterim artdy.
- Hasabat döwründe Döwlet haryt-çig mal biržasy tarapyndan 275 sany birža söwdasy geçirilip, 34 müň 7 şertnama hasaba alyndy.
- Söwda-senagat edarasy tarapyndan ýanwar — noýabr aýlarynda ýerine ýetirilen işler boýunça 118,4 göterim ösüş depgini gazanyldy. Hasabat döwründe 19 sergi we 61 maslahat geçirildi.
- Senagatçylar we telekeçiler birleşmesi boýunça on bir aýda oba hojalyk we azyk önümlerini öndürmegiň ösüş depgini 175,4 göterime, senagat önümleriniň ösüş depgini bolsa 113,4 göterime deň boldy.
- Kabul edilen maksatnamalara laýyklykda, ykdysadyýetimizde hususy pudagyň paýy hem ýokarlanýar.
- Eksporta niýetlenen önümleri artdyrmak boýunça çäreleriň amala aşyrylmagy netijesinde, dürli görnüşli önümleriň eksport edilen möçberi, geçen ýyl bilen deňeşdireniňde, 50 göterime golaý artdy.
- Daşary ýurtlardan getirilýän harytlaryň ornuny tutýan önümleri özümizde öndürmek we täze görnüşli önümleri öndürmegiň hasabyna eksporty artdyrmak boýunça işleri dowam etdiriler.