Aşgabatda Türkmenistanyň Bilim ministrliginiň we Volunteer Services Overseas (VSO) halkara guramasynyň wekilleriniň arasynda möhüm duşuşyk geçirildi. Türkmenistan tarapyndan duşuşyga Bilim ministriniň orunbasary jenap Azat Ataýew we halkara hyzmatdaşlyk bölüminiň başlygy hanym Gülnabat Gurdowa gatnaşdylar.
Volunteer Services Overseas (VSO) halkara guramasy bolup, onuň ştab-kwartirasy Beýik Britaniýanyň London şäherinde ýerleşýär. VSO bilim, saglygy goraýyş hem-de ýaşaýyş-durmuş serişdeleri bilen üpjün etmek ýaly esasy ugurlarda meýletin goldaw bermek we adam mümkinçiliklerini ösdürmek boýunça ýöriteleşen guramadyr. Bu gurama 20-den gowrak ýurtda işjeň hereket edip, bilimiň hilini ýokarlandyrmaga, mugallymlary taýýarlamaga we inklýuziw bilim gurşawyny döretmäge aýratyn üns berýär. Gurama durnukly ösüşi üpjün etmäge we hemmeler üçin deň mümkinçilikleri döretmäge gönükdirilen taslamalary durmuşa geçirýär.
Duşuşygyň maksady bilim ulgamyndaky hyzmatdaşlygyň mümkinçiliklerini we tejribe alyşmak meselelerini ara alyp maslahatlaşmakdan ybarat boldy. Mugallymlaryň hünär derejesini ýokarlandyrmak, okatmagyň döwrebap usullaryny ornaşdyrmak hem-de häzirki zaman globallaşan dünýäde ýaşamak üçin okuwçylarda zerur bolan başarnyklaryň emele getirilmegine gönükdirilen bilim maksatnamalaryny ösdürmek baradaky meselelere aýratyn üns berildi.
VSO guramasynyň wekilleri, şol sanda jenap Purna Şrestha we hanym Joýs Laker, mugallymlary, mekdepleri we okuwçylary goldamak hem-de ösdürmek boýunça bilim başlangyçlarynyň ähmiýeti barada aýratyn belläp geçdiler. Olar bilim ulgamyny kämilleşdirmek we mugallymlaryň mümkinçiliklerini berkitmek babatda toplan tejribesini paýlaşmaga taýýardyklaryny bellediler.
Duşuşygyň çäklerinde Türkmenistanyň bilim ulgamyny döwrebaplaşdyrmaga gönükdirilen bilelikdäki taslamalary durmuşa geçirmek mümkinçilikleri ara alnyp maslahatlaşyldy. Dünýäniň iň oňat tejribelerini alyşmak we okatmagyň innowasion usullaryny ornaşdyrmak meseleleri aýratyn gyzyklanma döretdi.
Duşuşyk hoşniýetli we konstruktiw atmosferada geçip, taraplaryň uzak möhletleýin hyzmatdaşlygy ösdürmäge bolan özara isleglerini görkezdi. Şeýle hem duşuşygyň dowamynda halklaryň arasyndaky dostlugy pugtalandyrmakda medeni we bilim alyş-çalşygyň ähmiýeti barada belläp geçildi.
Duşuşygyň ahyrynda gatnaşyjylar bilelikdäki tagallalaryň bilim ulgamynda möhüm üstünlikleri gazanmaga we Türkmenistanyň okuwçylary hem-de mugallymlary üçin täze mümkinçilikleri döretmäge ýardam berjekdigine ynam bildirdiler.