Hazarýaka ýurtlaryň saz medeniýetiniň tanymal wekillerini Astrahan kremliniň meýdançasyna ýygnan «Hazar möwsümleri» atly Halkara nusgawy sungat festiwaly dabaraly konsert bilen açyldy.
Russiýanyň Medeniýet ministri Olga Lýubimowa festiwala gatnaşýanlara wideo arkaly gutlag ýüzlenmesini iberdi.
Açylyş gününde festiwalyň geçýän meýdançasynda Astrahan welaýatynyň häkimi Igor Babuşkin hem boldy. Onuň aýtmagyna görä, «Hazar möwsümleriniň» geçirilmegi Hazar ýakasynda ýerleşen bäş döwletiň parahat durmuşda ylalaşyp ýaşaýandygyna şaýatlyk edýär.
Şu ýylyň aprel aýynda Igor Babuşkiniň «Hazar – dostluk deňzi» atly motosiklet ýaryşynyň çäginde Türkmenistana we beýleki Hazarýaka ýurtlara baryp görendigini ýatladýarys.
Motosiklet ýaryşy hoşniýetli goňşuçylykly gatnaşyklary berkitmäge we köptaraply hyzmatdaşlygy mundan beýläk-de ösdürmäge gönükdirilendir.
Medeni gatnaşyklar köpýyllyk işdeşligiň bir ugrudyr. Şu nukdaýnazardan, nusgawy sungatyň Halkara festiwalyny açmak hormaty Hazarýaka döwletleriniň simfoniki orkestriniň paýyna düşdi. Orkestriň düzüminde 60-dan gowrak russiýaly, gazagystanly, eýranly, azerbaýjanly we türkmenistanly sazanda bar.
Türkmenistanyň at gazanan artisti Leýli Ökdirowa hem şu köpmilletli toparyň sazy astynda çykyş etdi.
Mundan başga-da konserte opera aýdymçysy, RF-niň at gazanan artisti Ildar Abdyryzakow, eýranly kompozitor we sazanda Mehdi Hosseýni, Gazagystanyň at gazanan işgäri, «Astana opera» teatrynyň aýdymçysy Nurlan Bekmuhambetow, Mariý teatrynyň aýdymçysy Olga Pudowa dagy gatnaşdy.
«Hazar möwsümleri» Halkara nusgawy sungat festiwaly sentýabryň 6-syna çenli dowam eder. Bu çäräniň çäginde oňa gatnaşýan her ýurda bagyşlanan konsertler geçiriler. Meselem, awgustyň 25-inden 29-yna çenli Astrahan filarmoniýasynda «Azerbaýjanyň güni», «Eýranyň güni», «Gazagystanyň güni» we «Türkmenistanyň güni» ýola goýlar.
Biziň ýurdumyza bagyşlanan konsertde Türkmenistanyň halk artisti Atageldi Garýagdyýew, Türkmenistanyň at gazanan artisti Wladimir Mkrtumow, şeýle hem Bahram Dolyýewiň ýolbaşçylygyndaky «Aşgabat kameratasy» kamera sazlary ansamblynyň çykyş etmegine garaşylýar.