11 — 17-nji iýun aralygynda Özbegistanyň Hywa şäherinde mekdep okuwçylarynyň arasynda Abu Reýhan Biruny adyndaky Halkara himiýa olimpiadasy geçirildi. Oňa jemi 15 ýurtdan — Türkmenistandan, Russiýadan, Belarusdan, Braziliýadan, Omandan, Türkiýeden, Gruziýadan, Hindistandan, Gazagystandan, Azerbaýjandan, Alžirden, Täjigistandan, Özbegistandan, Wýetnamdan, Gyrgyz Respublikasyndan okuwçylaryň 110-dan gowragy gatnaşdylar.
Dünýäniň dürli künjeklerinden ýaş himikleri bir meýdança jemlän bu olimpiadada okuwçylar nazary bilimler we tejribe işlerini geçirmek boýunça bäsleşdiler. Bu abraýly bäsleşige ýurdumyzyň umumybilim berýän mekdeplerinden saýlanan okuwçylaryň 8-si gatnaşyp, olara Halaç etrabyndaky 17-nji orta mekdebiň himiýa mugallymy Serdar Begenjow ýolbaşçylyk etdi.
Halkara olimpiadada türkmenistanly okuwçylar üstünlikli çykyş edip, 6 sany bürünç medal gazanmagy başardylar. Has takygy, olimpiadanyň netijelerine görä, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 10-njy synp okuwçylary Şatlyk Batyrow, Mährijemal Gündogdyýewa, Jeren Akmyradowa, Adyl Serdarow, Mekan Ahmedow we Aşgabat şäherindäki 37-nji orta mekdebiň 10-njy synp okuwçysy Ogulbaýram Berdimyradowa bürünç medallara mynasyp boldular.