Gümrük amallaryny ýönekeýleşdirmek we sazlaşdyrmak boýunça täzeden seredilen Kioto konwensiýasyna goşulyşmak meselesine bagyşlanan iş maslahaty geçirildi diýlip Türkmenistanyñ Döwlet Gümrük Gullugynyň web saýtynda aýdylýar. Habarda bellenişine görä, Türkmenistanyň Ministrler Kabinetiniň 2020-nji ýylyň 11-nji sentýabrynda geçirilen mejlisinde Ministrler Kabinetiniň Başlygynyň orunbasary, daşary işler ministri R.Meredowyň Türkmenistanyň Gümrük amallaryny ýönekeýleşdirmek we sazlaşdyrmak boýunça täzeden seredilen Kioto konwensiýasyna goşulmagy baradaky teklibine laýyklykda, 2020-nji ýylyň 18-nji sentýabrynda Türkmenistanyň degişli ministrlikleriniň we pudak edaralarynyň wekilleriniň gatnaşmagynda Bütindünýä gümrük guramasy bilen bilelikde wideo aragatnaşyk arkaly iş maslahaty geçirildi.
Türkmenistanyñ Döwlet Gümrük Gullugynyň saýtynda aýdylyşyna görä, iş maslahatyna Döwlet gümrük gullugyndan we söwda amallary we halkara ýük daşamalary bilen bagly işi amala aşyrýan degişli ministrliklerinden we pudak edaralaryndan ýigrimi töweregi wekiller gatnaşdy. Iş maslahatyna gatnaşan Bütindünýä gümrük guramasynyň bilermenleri gatnaşyjylara Konwensiýanyň düzgünlerini giňişleýin düşündirdiler we oňa goşulyşmak üçin bildirilýän talaplar, şertler barada aýtdylar.
Meşhur sungat işgärleri Ata Watan Türkmenistanda myhmançylykda
