Şu gün Aşgabatda geçirilýän «Halkara ulag-üstaşyr geçelgeleri: özara arabaglanyşyk we ösüş» atly halkara maslahatyň çäklerinde Türkmenistanyň, Eýranyň, Gyrgyz Respublikasynyň, Özbegistanyň, Täjigistanyň we Türkiýäniň ulag düzüminiň wekilleriniň gatnaşmagynda Ykdysady hyzmatdaşlyk guramasynyň çäklerinde ulag geçelgelerini döretmek meseleleri boýunça duşuşyk geçirildi.
Bu ugurda ilkinji duşuşykda Gyrgyzystan-Özbegistan-Türkmenistan-Eýran we Tajigistan-Özbegistan-Türkmenistan-Eýran-Türkiýe halkara ulag geçelgelerini döretmek boýunça özara pikir alyşmalar geçirilýär.
Bu ulag geçelgelerini döretmek pikiri türkmen tarapynyň başlagyjy esasynda öňe sürüldi. Ol Ykdysady hyzmatdaşlyk guramasy sebitinde ykdysady aragatnaşyklary pugtalandyrmaga, şeýle hem ähli ulag görnüşlerinde halkara kombinirlenen ýük gatnawlaryny ösdürmäge gönükdirilendir.
Şeýle hem duşuşygyň barşynda howply ýükleriň, gözegçilik-geçiriş nokatlarynyň, awtomobil we demirýol ýollarynyň ýeke-täk sanawyny döretmegiň maksadalaýyk boljakdygy bellenilip geçildi.
Ýük gatnawyny artdyrmak, gurama gatnaşyjy döwletleriň arasynda ulag-logistika bileleşikleriniň we assosiasiýalarynyň arasynda hyzmatdaşlygy ýygjamlaşdyrmak maksady bilen taraplar YHG-nyň sekretariatyna özüniň milli ulag-logistika bileleşikleri we assosiasiýalary barada maglumat berip, hyzmatdaşlyk boýunça umumy ylalaşygy baglaşagyň mümkinçiliklerine seretmek göz öňünde tutulýar.