2025-nji ýylyň 3-4-nji fewralynda Syýahatçylyk we migrasiýa babatda ikitaraplaýyn hyzmatdaşlygy ýola goýmak we bu ugurda gepleşikleri geçirmek maksady bilen Türkmenistanyň Döwlet migrasiýa gullugynyň başlygynyň orunbasarynyň ýolbaşçylygyndaky türkmen wekiliýeti Katar Döwletiniň Doha şäherine iş saparyny amala aşyrdy. Bu barada gullugyň resmi saýtynda habar berilýär.
Iş saparynyň dowamynda türkmen wekiliýeti Kataryň degişli edaralary bilen duşuşyk geçirdi. Duşuşygyň dowamynda türkmen wekiliýetiniň ýolbaşçysy çykyş edip, hormatly Gahryman Prezidentimiziň baştutanlygynda ýurdumyzyň alyp barýan ynsanperwer syýasaty, Türkmenistanyň migrasiýa ulgamynda, şeýle hem dünýäniň abraýly halkara guramalary we olaryň düzümleri bilen durmuşa geçirýän ähmiýetli işleri, ýurdumyzyň toplan oňyn tejribeleri barada nygtap geçdi.
Taraplar Türkmenistan bilen Kataryň ikitaraplaýyn hyzmatdaşlygynyň migrasiýa ulgamyndaky gatnaşyklaryň geljegi we mümkinçilikleri barada pikir alşyp, onuň ileri tutulýan ugurlaryny ara alyp maslahatlaşdylar. Şeýle-de taraplar hyzmatdaşlygyň geljekde hem sazlaşykly ösdüriljekdigine ynam bildirip, bu ugurda alnyp barylýan ähmiýetli işlerde üstünlikleri arzuw etdiler.
Türkmenistan – Katar migrasiýa babatda hyzmatdaşlyk ösdürilýär
