Türkmenistan şu ýylyň 13-15-nji fewralynda Birleşen Arap Emirliklerinde geçiriljek ýokary derejedäki sammite gatnaşar. Bu barada BAE-niň Aşgabatdaky ilçihanasynyň jemgyýetçilik torunda habar berilýär.
Habar berlişine görä, 2023-nji ýylyň 13-15-nji fewralynda BAE-de geçiriljek Bütindünýä hökümet sammitine Türkmenistanyň wise-premýeri, daşary işler ministri Raşid Meredow gatnaşar.
Sammite 20 ýurduň döwlet we hökümet baştutanynyň, 250-den gowrak ministriň, 10 müňe golaý döwlet işgäriniň, şeýle hem köp sanly bilermenleriň we abraýly wekiliýetleriň gatnaşmagyna garaşylýar.
Bütindünýä hökümet sammiti her ýyl Dubaýda geçirilýän ýokary derejedäki duşuşygyň biridir. Bu sammitiň dowamynda durmuş we ykdysady meseleler, şol wagtda täzelikçi tehnologiýalar barada giňişleýin gürrüň edilýär we köp sanly duşuşyklar geçirilýär.
Bu sammitiň döredilenene 10 ýyl doldy.