Şu gün Türkmenistanyň Döwlet çeperçilik akademiýasynyň sergiler jaýynda Türkmen bedewiniň milli baýramy mynasybetli «Türkmeniň uçar ganaty» atly bäsleşik sergisi öz işine başlady.
Oňa bu ýokary okuw mekdebiniň mugallymlarydyr talyplary we şekillendiriş sungaty bilen gyzyklanýan suratkeşler türkmen bedewini wasp edýän nakgaşlyk, amaly-haşam, suratkeşlik, heýkeltaraşlyk, zergärçilik, grafika eserleri bilen gatnaşýarlar.
Sergä hödürlenen her bir eserde türkmen bedewiniň ajaýyp keşbi, syrdam bedeni, üşükliligi ussatlyk bilen suratlandyrylypdyr.
Şeýle hem sergide Berkarar döwletiň täze eýýamynyň Galkynyşy döwründe ahalteke bedewleriniň örüsini giňeltmekde, olaryň nesil arassalygyny saklamakda, atçylyk sportuny ösdürmekde, türkmen bedewleriniň şanly taryhyny, seýisçilik ýoluny açyp görkezýän beýik işleri şöhlelendirilipdir.
Bäsleşige hödürlenen zergärçilik önümlerinden at şaý-sepleri aýratyn özboluşlylygy bilen tapawutlanýar.