Üstünlikli tamamlanan, taryhy wakalara baý bolan Arkadag Serdarly bagtyýar ýaşlar ýylymyzdan soň, täze 2024-nji, ýagny «Pähim-paýhas ummany Magtymguly Pyragy» ýylymyzyň ilkinji günleri hem uly şanly wakalara beslenýär.
Şu gün Türkmenistanyň şekillendiriş sungaty muzeýinde Eýran Yslam Respublikasynyň hem-de türkmen zenan suratkeşleriniň gatnaşmagynda şekillendiriş sungatynyň eserleriniň sergisi we maslahaty geçirildi. Bu bolsa iki halkyň arasyndaky doganlyk, özara düşünişmek, hoşniýetli goňşuçylyk ýörelgelerine esaslanýan gatnaşyklaryň hil taýdan täze mazmuna eýe bolýandygyny aýdyň görkezýär.
Daş-töweregiňdäki gözellikleri, dünýä ajaýyplyklaryny dürli reňkler bilen sazlaşdyryp kagyz ýüzüne geçirmek, hala çitmek, nagyşlarda sünnälemek her bir ynsan üçin mahsus duýgularyň biri. Bu duýgy mähre, söýgä berlip, zenan kalbynyň töründe has hem uly orun alýar. Zenanyň giň dünýägaraýşy, filosofiki pikirleri şekillere siňýär hem-de aňyrsyna göz ýetmeýän owadan dünýäniň keşbini göz öňüňde janlandyrýar. Ol işleri synladygyňça synlasyň gelýär.