Türkmen telekeçileriniň 2023-nji ýylda eksporta iberen oba hojalyk önümleri ABŞ-nyň 135 million dollaryna deň boldy. Bu görkeziji 2022-nji ýyl bilen deňeşdirilende 10 göterimden hem ýokarydyr.
Eksport ugurly önümleriň möçberiniň artmagynda lebaply telekeçileriň hem paýy uludyr. Welaýatyň telekeçileri her ýylda ABŞ-nyň onlarça million dollarlyga barabar önümleri eksport edýärler. Bu görkeziji milli ykdysadyýetiň eksport ugrunyň ösmegine lebaply hususyýetçileriň goşýan goşandynyň saldamlydygyny aýdyň görkezýär.
“Türkmen gündogary” gazetiniň habaryna görä, «Altyn saraý», «Döwrebap çözgüt», «Altyn bürgüt», «Mizemez gadam» ýaly hususy kärhanalar ýurdumyzyň eksport kuwwatynyň artmagyna uly goşant goşýarlar. Häzirki wagtda welaýatymyzda öz önümlerini eksporta iberýän hususy kärhanalaryň sany 16-a ýetdi. Bu san ýene-de artmak bilen.
Çärjew etrabynyň S.A.Nyýazow adyndaky daýhan birleşiginiň çäginde pomidor ýetişdirýän telekeçi Güljahan Haýidowa hem öz önümlerini eksporta iberýänleriň hataryna goşuldy. Geçen ýylda işewür zenan hususy ýyladyşhanasynda ýetişdiren pomidor hasylynyň 120 tonnasyny Russiýa, Gazagystana, Gyrgyzystana, Täjigistana eksport etdi.
Türkmenistanda geçen ýylda diňe pomidor önümçiliginiň eksport söwdasy ABŞ-nyň 100 million dollaryna ýetdi.