Russiýanyň Senagatçylar we telekeçiler birleşmesiniň binasynda Türkmenistanyň Senagatçylar we telekeçiler birleşmesiniň başlygy D.Hudaýberdiyew bilen gepleşikler geçirildi. Bu barada Russiýanyň Senagatçylar we telekeçiler birleşmesiniň resmi internet saýtynda bellenilip geçilýär.
Duşuşyga rus işewürlik birleşmesiniň başlygynyň orunbasarlary Aleksandr Muryçew we Sergeý Krasilnikow, şeýle hem Halkara köptaraplaýyn hyzmatdaşlyk we integrasiýa boýunça dolandyryjy direktor Sergeý Mihnewiç, “GDA-nyň ykdysady ösüşiniň işewürlik merkezi” atly assosiasiýasynyň utgaşdyryjy geňeşiniň başlygy Anatoliý Kazakow, “Ýewro-Aziýa hyzmatdaşlygynyň maliýe-biznes assosiasýasynyň baş direktory Oleg Berezowoý dagy gatnaşdy.
Duşuşygyň dowamynda türkmen-rus işewür hyzmatdaşlygyny giňeltmek maksady bilen iki birleşmäniň arasyndaky özara gatnaşyklary ösdürmegiň meseleleri ara alnyp maslahatlaşyldy.
Russiýanyň Senagatçylar we telekeçiler birleşmesiniň başlygynyň orunbasary Aleksandr Muryçew 2015-nji ýyldan bäri iki ýurduň birleşmeleriniň arasynda hyzmatdaşlyk ylalaşygynyň hereket edýändigini belledi.
Türkmenistanyň Senagatçylar we telekeçiler birleşmesiniň ýolbaşçysy rus kärdeşlerine ýurdumyzyň işewürler düzümini öz içine alýan iri jemgyýetçilik guramasynyň alyp barýan işleri barada gürrüň berip, birleşmäniň howandarlygynda eksportçylara goldaw instituty döretmek meýilnamalary barada aýtdy.
Taraplar şeýle hem türkmen-rus hyzmatdaşlygyny ösdürmek üçin geljegi uly ugurlary ara alyp maslahatlaşdylar: gurluşyk, oba hojalygy, şol sanda gök önümleri ösdürip ýetişdirmek üçin ýyladyşhanalary gurmak ýaly ugurlardaky hyzmatdaşlyk gatnaşyklary boýunça pikir alşyldy.
Mundan başga-da, taraplar Türkmenistanyň çäginde “COVID-19” wirusyna garşy sanjymlary öndürmek, şol sanda serhet ýurtlaryna eksport etmek mümkinçiligi barada pikir alyşdylar.
Türkmenistanyň we Ermenistanyň daşary işler ministrleriniň duşuşygy