Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Birleşen Milletler Guramasynyň Baş sekretary Antoniu Guterrişiň arasynda telefon arkaly söhbetdeşlik boldy. Bu barada “Watan” habarlar gepleşingde habar berildi.
Şu ýyl Birleşen Milletler Guramasynyň Baş Assambleýasynyň “2025-nji ýyly Halkara parahatçylyk we ynanyşmak ýyly” atly Kararnamasynyň durmuşa geçirilmegine gönükdiriler hem-de Türkmenistanyň Bitaraplygynyň 30 ýyllygyna bagyşlanan çäreleriň giň gerimli maksatnamasyny amala aşyrmak wezipeleri durýar.
Halkara forumynyň geçirilmegi öňde durýan halkara wakalarynyň esasy wakasy bolup biler – diýip, türkmen halkynyň Milli Lideri aýtdy hem-de bu forumy şu ýylyň 12-nji dekabrynda ýurdumyzyň paýtagty Aşgabat şäherinde döwlet Baştutanlarynyň we halkara guramalarynyň ýolbaşçylarynyň derejesinde guramagyň göz öňünde tutulýandygyny belldi.
Şunuň bilen baglylykda, Birleşen Milletler Guramasynyň Baş sekretary Antoniu Guterrişi bu sammite gatnaşmaga uly hormat bilen çagyrdy.
Birleşen Milletler Guramasynyň Baş sekretary Antoniu Guterriş 2025-nji ýylyň Türkmenistanda Halkara parahatçylyk we ynanyşmak ýyly diýlip bellenilmeginiň ähmiýetini belläp, şu ýylyň Türkmenistanyň hemişelik Bitaraplygynyň 30 ýyllygynyň hem-de Birleşen Milletler Guramasynyň döredilmeginiň 80 ýyllygyna beslenýändigini aýtdy.
Şunuň bilen baglylykda, Birleşen Milletler Guramasynyň Baş sekretary Antoniu Guterriş guramanyň düzümleriniň Türkmenistanda tarapyndan guraljak halkara çärelere işjeň gatnaşjakdygyny belledi.
Türkmen halkynyň Milli Lideri ýurdumyzyň Milletler Birleşigi bilen ýakyndan hyzmatdaşlyk etmäge taýýardygyny ýene-de bir gezek tassyklady hem-de Bitarap Türkmenistanyň Birleşen Milletler Guramasynyň ynamdar hyzmatdaşy hem-de pikirdeşi, sebitde we dünýäde ygtybarly daýanjy bolandygyny, bolýandygyny we şeýle bolmagynda galjakdygyny belledi.
Telefon arkaly söhbetdeşlik Birleşen Milletler Guramasynyň Baş sekretary Antoniu Guterrişiň başlangyjy boýunça geçirildi.