Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Koreýa Respublikasynyň öz ýurdunyň wekilçilikli toparyna ýolbaşçylyk edip, Türkmenistana resmi sapar bilen gelen Milli Assambleýasynyň Başlygy Kim Çžin-Pýo bilen duşuşygy boldy. Ikiçäk we giňişleýin düzümde geçirilen gepleşiklerde iki ýurduň arasyndaky parlamentara gatnaşyklarynyň häzirki ýagdaýy we ony mundan beýläk-de ösdürmegiň geljekki ugurlary ara alnyp maslahatlaşyldy.
Koreýa Respublikasynyň Türkmenistanyň Garaşsyzlygyny ykrar eden ilkinji döwletleriň biridigini belläp, Gahryman Arkadagymyz şu ýyl ýurdumyzda Garaşsyzlygymyzyň 32 ýyllygynyň baýram ediljekdigini aýtdy we myhmany guraljak dabaralara gatnaşmaga çagyrdy. Şeýle hem Türkmenistan BMG-niň Baş Assambleýasy tarapyndan Bitaraplyk derejesi iki sapar ykrar edilen döwlet bolup durýar. Koreýa Respublikasynyň degişli kararnamalaryny goldandygyny aýdyp, türkmen halkynyň Milli Lideri munuň üçin dostlukly ýurduň ýolbaşçylaryna öz minnetdarlygyny beýan etdi.
Kim Çžin Pýo Koreýa Respublikasynda Türkmenistanyň ähli ugurlar boýunça gazanýan üstünliklerine, ýeten derejesine uly gyzyklanma bilen syn edilýändigini belläp, Koreýanyň öňdebaryjy kompaniýalaryň ikitaraplaýyn hyzmatdaşlygy giňeltmäge bolan gyzyklanmalaryny beýan etdi.
Soňky ýyllarda Koreýanyň iri kompaniýalary geljegi uly hasaplanylýan türkmen bazarynda öz orunlaryny pugtalandyrýarlar. Koreýaly işewür düzümleriň dünýäde ygtybarly hyzmatdaş we özüniň hyzmatdaşlyk borçlaryna örän jogapkärçilikli çemeleşýän ýurt hökmünde ykrar edilen Türkmenistan bilen dürli ugurlar boýunça gatnaşyklary giňeltmäge uly gyzyklanma bildirýändigi bellenildi.