Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow iş sapary bilen Birleşen Arap Emirliklerine ugrady. Bu barada “Watan” habarlar gepleşiginde bellenilip geçildi.
Türkmen halkynyň Milli Liderini BAE-niň paýtagty Abu-Dabiniň halkara howa menzilinde BAE-niň energetika ministri Suheýl Al Mazrui we beýleki resmi adamlar garşylady. Bu ýerde türkmen halkynyň Milli Lideri bilen BAE-niň energetika ministri Suheýl Al Mazruiniň arasynda duşuşyk geçirildi.
Soňra türkmen halkynyň Milli Lideri BAE-niň Prezidentiniň Türkmenistan bilen işleri boýunça wekili Mohammed Said Mohammed Al Ariki bilen duşuşdy.
Duşuşygyň barşynda iki ýurduň arasynda ýangyç-energetika, ulag-aragatnaşyk, bank we maliýe, söwda-ykdysady ugurlary türkmen-emirlikler gatnaşyklarynyň esasy ugurlary hökmünde görkezildi.
Şeýle hem türkmen halkynyň Milli Lideri BAE-niň Prezidenti Şeýh Mohammed bin Zaýed Al Nahaýýan bilen duşuşyp, ikitaraplaýyn hyzmatdaşlyk gatnaşyklaryny giň gerimde ara alyp maslahatlaşdy.
Türkmen halkynyň Milli Lideriniň Birleşen Arap Emirliklerine sapary dowam edýär.