Gyrgyz Respublikasynda geçirilen Ýewropa Bileleşigi-Merkezi Aziýa birinji Ykdysady forumyna gatnaşan Türkmenistanyň Ministrler Kabinetiniň Başlygynyň orunbasary Çary Gylyjow bu ýurduň Ministrler Kabinetiniň Başlygy Akylbek Žaparow bilen duşuşdy. Bu barada Gyrgyz Respublikasynyň hökümetiniň metbugat gullugy habar berýär.
Ministrler Kabinetiniň Başlygy Akylbek Žaparow türkmen tarapyna ykdysady foruma gatnaşandygy üçin minnetdarlyk bildirdi we Türkmenistany Merkezi Aziýada möhüm ykdysady hyzmatdaş hökmünde garaýandyklaryny belledi.
– Ähli ugurlarda, şol sanda energetika we ulag ulgamlarynda özara bähbitli hyzmatdaşlygyň giň mümkinçilikleriniň bardygyny uly buýsanç bilen belläp bilerin. Gyrgyz Respublikasy Tükrmenistandan maýadarlar bilen hyzmatdaşlyk etmäge hem-de ikitaraplaýyn söwda dolanyşygyny bilelikdäki tagallalar bilen ýokarlandyrmaga hemişe açykdyr – diýip, Akylbek Žaparow mälim etdi.
Türkmen tarapy Gyrgyz Respublikasynyň Prezidenti Sadyr Žaparowyň şu ýylda Türkmenistana amala aşyran saparynyň türkmen-gyrgyz hyzmatdaşlygynyň hem-de iki halkyň arasyndaky dostlukly gatnaşyklaryň berkemegine täze itergi bermeginde möhüm ähmiýete eýe bolandygyny belledi.
Taraplar iki ýurduň arasynda söwda görkezijileriniň okgunly ösüşine uly kanagatlanma bildirdi. Ol hem mundna beýläk-de ikitaraplaýyn söwdanyň artdyrylmagyna mümkinçiligiň bardygyny görkezýär.
Energetika hyzmatdaşlygy bilen baglylykda, Ministrler Kabinetiniň Başlygy Akylbek Žaparow türkmen elektrik energiýasynyň Gyrgyz Respublikasyna iberilmeginiň möhümdigini belläp, geljekde türkmen tebigy gazynyň hem iberilmeginiň has möhüm boljakdygyny aýtdy.
Mundan başga-da, gepleşikleriň barşynda bilelikdäki türkmen-gyrgyz gaznasyny döretmek, şeýle hem ulag-logistika we medeni-ynsanperwer ulgamlarda özara gatnaşyklaryň işjeňleşdirmek baradaky meseleler hem ara alnyp maslahatlaşyldy.
Ozal habar berşimiz ýaly, Ýewropa Bileleşigi-Merkezi Aziýa birinji Ykdysady forumyna gatnaşan türkmen wekiliýetiniň hatarynda bolan türkmen telekeçileri gyrgyz kärdeşleri bilen harytlary ýerlemek babatda köp sanly şertnamalar gol çekişdiler.