2022-nji ýylyň 14-nji dekabrynda Türkmenistanyň “Awaza” milli syýahatçylyk zolagynda Türkmenistanyň, Türkiýe Respublikasynyň we Azerbaýjanyň Prezidentleriniň gatnaşmagynda geçirilen üçtaraplaýyn sammitde gol çekilen ähtnama tassyklandy.
Türkiýe Respublikasynyň Prezidenti Rejep Taýyp Ärdogan Türkmenistanyň, Türkiýe Respublikasynyň we Azerbaýjanyň arasynda gümrük babatda hyzmatdaşlyk etmek boýunça bilelikdäki konsultatiw topary döretmek hakyndaky özara düşünişmek boýunça ähtnamanyň tassyklanmagyna degişli kararnama gol çekdi.
Bu kararnama Türkiýe Respublikasynyň resmi gazetinde neşir edildi. Şol neşirde bellenilip geçilişi ýaly, bu ähtnama 3 ýurduň arasynda gümrük hyzmatdaşlygy üçin bilelikdäki konsultatiw topary döretmäge, şeýle hem bu ulgamda hyzmatdaşlygy has-da gowulandyrmak üçin maglumat alyş-çalşygyny ýola goýmaga mümkinçilik berer.
Mälim bolşy ýaly, Azerbaýjanyň Prezidenti bu resminamany şu ýylyň 27-nji aprelinde tassyklamak hakyndaky karara gol çekipdi.