Gyrgyzystanyň paýtagty Bişkek şäherinde geçirilýän Türki Döwletleriň Guramasynyň 11-nji sammitiniň çäklerinde “Türki Döwletleriň Guramasynyň agza döwletleriniň Merkezi banklarynyň geňeşini döretmek hakynda” ähtnama gol çekildi.
Gyrgyzystanyň Milli bankynyň habar bermegine görä, ähtnama Gyrgyzystanyň Milli bankynyň başlygy Melis Turgunbaýew, Azerbaýjanyň Merkezi bankynyň başlygy Taleh Kýazymow, Gazagystanyň Milli bankynyň başlygy Timur Suleýmanow, Türkiýäniň Merkezi bankynyň başlygy Fatih Karahan we Özbegistanyň Merkezi bankynyň başlygy Mamarizo Nurmuratow gol çekdi.
Guramanyň Merkezi banklarynyň (milli) geňeşiniň döredilmegi bank edaralarynyň arasyndaky hyzmatdaşlygy pugtalandyrmaga, pul-karz syýasaty boýunça bilelikdäki barlaglary we geňeşmeleri geçirmäge, maliýe durnuklylygy üpjün etmäge, töleg ulgamyny we maliýe tehnologiýalary ösdürmäge gönükdirilendir.