Milli ykdysadyýetimiziň ähli pudaklaryny sanly ykdysadyýete geçirmek döwlet syýasatynyň ileri tutulýan ugurlarynyň birine öwrüldi. «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasy» muňa aýdyň şaýatlyk edýär. Bu Konsepsiýanyň durmuşa geçirilmegi ykdysadyýetimizi çalt depginlerde ösdürmäge we sanly tehnologiýalary ulanmagyň hasabyna ilatyň ýaşaýyş-durmuş şertlerini ýokarlandyrmaga mümkinçilik berer.
Türkmenistanda sanly ykdysadyýeti ornaşdyrmak, «Elektron hökümet» ulgamyny doly derejede işe girizmek boýunça netijeli işler alnyp barylýar. Maglumat we telekommunikasiýa hyzmatlary babatda işleriň hukuk taýdan kadalaşdyrylmagyny kämilleşdirmek dowam etdirilýär. Iri taslamalary amala aşyrmak boýunça maksatnamalaýyn işler durmuşa geçirilýär.
Bu babatda halkara hyzmatdaşlygyna uly ähmiýet berlip, bu babatda iri halkara sergilerdir maslahatlar geçirilýär. Ine, şu günler paýtagtymyz Aşgabatda Söwda-senagat edarasynda telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel — 2022» atly XV halkara sergisi öz işine başlady.
Häzirki wagtda ýurdumyzda ähli ulgamlarda halkara ölçeglere laýyk gelýän täze innowasion, sanly tehnologiýalary, maglumat-aragatnaşyk enjamlaryny ornaşdyrmak işleri mynasyp dowam etdirilýär. Dünýä ýurtlary bilen maglumat-aragatnaşyklary alyp barmak, ýer ýüzüniň iň ösen habar beriş serişdeleriniň wekilleri bilen tejribe alyşmakda geçirilýän sergileriň, halkara ähmiýetli çäreleriň orny uludyr.
Ýurdumyzyň telekommunikasiýa ulgamynyň hünärmenleri bilen daşary ýurtly hyzmatdaşlaryň geljekde giň gerimli gatnaşyklary ýola goýmagynda, wajyp taslamalary ara alyp maslahatlaşmakda uly ähmiýete eýe bolan bu sergä döwletimiziň telekommunikasiýa boýunça iş alyp barýan wekiller, ýurdumyzyň döwlet we hususy düzümlerinden 36-sy, daşary ýurt kompaniýalarynyň 20-den gowragy, habar serişdeleriniň agzalary, şeýle-de myhmanlar gatnaşdylar.
Bu ýere gelen myhmanlara ýurdumyzyň innowasion ösüş ýoluny, şeýle-de maglumat-aragatnaşyk giňişliginde gazanan üstünliklerini beýan edýän elektron enjamlary, tehnikalaryň taslamalary, tanyşdyrylyş wideo we audio ýazgylary giňden görkezildi.
Milli ykdysadyýetimizi döwrebaplaşdyrmakda, ýurdumyzy durmuş taýdan ösdürmekde, sanly tehnologiýalaryň gurluşyny, maddy-tehniki, hukuk binýadyny döwrüň talaplaryna laýyklykda giň ýola goýulmagynda uly üstünlikleri eýeleýän Türkmenistan döwletimiz bu günki gün halkara giňişliginde ösen döwletleriň hatarynda giňden tanalýar.
Umuman, garaşsyz ýurdumyz halkara derejede işjeň we netijeli gatnaşyklaryň giňeldilmegine mynasyp goşant goşup, ähli ulgamlarda ýokary ösüş depginlerini gazanýar hem-de dünýä bileleşiginiň ünsüni özüne çekýär. «Açyk gapylar» syýasatyny işjeň durmuşa geçirmek arkaly Türkmenistan döwletimiz Beýik Ýüpek ýolunyň häzirki zaman şertlerinde täzeden dikeldilmegine işjeň gatnaşýar. Bu ugurda ýurdumyzda sebitleýin hem-de ählumumy ähmiýetli maslahatlardyr forumlar yzygiderli geçirilýär.
Aýsülük Nyýazmeňliýewa,
Türkmenistanyň Inžener-tehniki we ulag kommunikasiýalary institutynyň Jemagat infrastrukturasy we inženerçilik ulgamlary fakultetiniň 1-nji ýyl talyby.