«Russiýanyň Demir ýollary» AGPJ-niň baş direktorynyň orunbasary Wýaçeslaw Pawlowskiý Türkmenbaşydan Türkmenabat şäherine çenli esasy ugurda Türkmenistanyň demirýol infrastrukturasynyň elektrikleşdirilmegine goşant goşmaga taýýardyklaryny mälim etdi. Bu barada ol habarçylara beren beýanatynda belläp geçdi.
“Infrastruktura taslamalary nukdaýnazaryndan Russiýa tarapy, Türkmenbaşydan Türkmenabat şäherine çenli esasy ugurda demirýol infrastrukturasynyň elektrikleşdirilmegine kömek bermäge taýýardyr we elektrikleşdirmek we işgärleri taýýarlamak üçin kadalaşdyryjy-hukuk binýadyny döretmek nukdaýnazaryndan toplumlaýyn çemeleşmäni teklip edýär” diýip, Wýaçeslaw Pawlowskiý aýtdy. Şeýle hem, taraplaryň Gyzylarbatdaky wagon abatlaýyş zawodynyň durkuny täzelemek meselesinde ylalaşandyklaryny aýtdy.
Ol iki ýurduň demirýol ulgamynyň arasyndaky hyzmatdaşlygyň okgunly häsiýete eýedigini belledi. Onuň bellemegine görä, «Russiýanyň Demir ýollary» AGPJ bilen “Türkmendemirýollary” agentliginiň arasynda 2023-2025-nji ýyllarda hyzmatdaşlyk etmegiň maksatnamasyna gol çekilipdi.
Şunuň bilen baglylykda, “Demirgazyk-Günorta” halkara ulag geçelgesi boýunça konteýner hyzmatlaryny ösdürmek bababtda bilelikdäki tagallalar amala aşyrylýar. Her aýda 4 konteýner otlusynyň görkezijisine ýetilendigini we onuň artdyrylmagynyň göz öňünde tutulýandygy bellenildi.
Mundan başga-da, türkmen tarapy bilen hyzmatdaşlygyň çäklerinde hünärmenler mümkinçiliginiň ösdürilmegi ugrunda hyzmatdaşlyk edilip, türkmen demirýolçularynyň Russiýanyň Demirýollary edarasynyň korporatiw uniwersitetinde okatmagyň maksatnamasy taýýarlandy.