Italiýanyň “Roma” topary ABŞ-nyň “Friedkin Group” kompaniýasy tarapyndan satyn alyndy. ABŞ-ly işewür Dan Fridkin Rim klubynyň esasy paýyny we käbir serişdeleri we infrastrukturany öz içine alýan emläklerini alar. Şeýlelikde, takmynan 10 aý dowam eden gepleşikler tamamlandy. “Roma” toparynyň resmi web saýtynda habar berlişi ýaly, topar Fridkine 700 million dollara satyldy. Klubyň häzirki eýesi Jeýms Pallotta bilen Fridkiniň arasyndaky şertnamanyň awgust aýynyň ahyryna çenli tamamlanmagyna garaşylýar.
Pallotta we beýleki üç amerikan maýadary bilen bilelikde 2011-nji ýyldan bäri “Roma” eýeçilik edýär. Dokuz ýyl dolandyran döwründe topar 8 baş tälimçini çalyşdy, bir gezek Italiýa kubogynyň finalyna çykdy, “Seria A” çempionatynda 3 gezek ikinji bolup, 2017/18 möwsüminde Çempionlar ligasynyň ýarym finalyna çykdy.