Germaniýanyň, Angliýanyň, Portugaliýanyň futbol boýunça milli çempionatlaryndan soňra Ispaniýanyň milli çempionatynda hem çempion belli boldy. Ispaniýanyň “Şa topary” hökmünde atlandyrylýan “Real Madrid” topary özüniň 34-nji çempionlygyny gazandy.
Koronawirus ýokanjy sebäpli arakesmeden soňra täzeden iýun aýynda badalga alan Ispaniýanyň çempionatynda “Real Madrid” topary 37-nji tapgyryň ahyrynda çempionlygyny yglan etdi. Ol çempionlyk ugrundaky esasy garşydaşy “Barselona” toparyndan aratapawudy açyp, 3 ýyldan soňra Madrid şäherine çempionlyk derejesini gaýtaryp getirdi.
37-nji tapgyryň netijeleri boýunça “Real Madrid” topary “Wilýareal” toparyny 2:1 hasbaynda utdy. “Barselona” topary bolsa “Osasuna” toparyna 2:1 hasabynda utuldy. Şeýlelikde, “Real Madrid” Ispaniýanyň futbol çempionatynda “La Ligada” 34-nji çempionlygyny gazandy.
“Real Madrid” toparynyň çempionlygy gysga setirlerde
- Arakesmeden sonra topar 10 duşuşygyň 10-yndan hem ýeňiş gazandy. 30 utuk toplady.
- “Real Madrid” esasy garşydaşy “Barselona” bilen gazanan kuboklaryny deňledi. Iki toparyň hem 91 kubogy bar.
- “Real Madrid” topary 34 gezek “La Liganyň” çempiony boldy. 19 gezek Ispaniýanyň kubogyny, 11 gezek Ispaniýanyň Superkubogyny, 1 gezek Liga kubogyny gazandy. Şeýle hem topary 26 sany halkara kubogy bar: 13 gezek Çempionlar Ligagasynyň, 2 gezek UEFA-nyň Kubogynyň, 4 gezek UEFA-nyň Superkubogynyň, 3 gezek yklymara kubogynyň kubogyny gazandy.
- Toparyň tälimçisi Zinedin Zidanyň ussatlygyny hem ýatdan çykarmak bolmaýar. 3,5 möwsümde topary bilen 11 kubok gazandy: Çempionlar ligasynda 3 ýeňiş, La Ligada 2 ýeňiş, Ispaniýanyň Super kubogy, Ýewropa Superkubogy we Klublaryň arasynda dünýä çempionatyny gazandy.