Özbegistanyň Prezidenti Şawkat Mirziýoýew 10-11-nji iýunda Täjigistanda resmi saparda bolar. Bu barada Özbegistanyň resmi habarlar gullugy habar berýär.
Saparyň çäklerinde birnäçe çäreler göz öňünde tutuldy: ikiçäk gepleşikler, giňeldilen düzümdäki gepleşikler, resminamalara gol çekmek, durmuş maksatly binalaryň onlaýn tertipde ulanmaga berilmegi we beýlekiler.
Iki ýurduň Prezidentleri Duşanbede bilelikdäki medeniýet çäresine gatnaşar hem-de Sogd welaýatyndaky käbir senagat desgalaryny aýlanyp görerler. Sapary dowamynda ikitaraplaýyn hyzmatdaşlygy ösdürmäge gönükdirilen 30-dan gowrak resminama gol çekilmegi göz öňünde tutulýar.
Iki ýurduň arasyndaky haryt dolanyşygy geçen ýyl 500 million dollardan gowrak boldy, 200-den gowrak bilelikdäki kärhana döredildi.
Bu sapardan öň, iki ýurduň Premýer-ministrleriniň gatnaşmagynda hökümetara toparyň mejlisi, ylmy-amaly maslahat, özbek filmleriniň güni we beýleki çäreler guraldy.
Şeýle hem saparyň öň ýanynda iki ýurduň işewürler geňeşiniň duşuşygy hem-de ilkinji sebitara forum guralar.